वीरगंज (पर्सा), ३ जेठ । मधेश प्रदेशकै एकमात्र शिक्षण अस्पतालका रूपमा परिचित नेशनल मेडिकल कलेज शिक्षण अस्पतालले अन्तर्राष्ट्रिय स्तरको आईएसओ गुणस्तर व्यवस्थापन प्रणालीअन्तर्गतको मान्यता प्राप्त गरेको छ । अस्पताललाई रोयल ईम्प्याक्ट सर्टिफिकेशन लिमिटेडका निर्देशक रोशन श्रेष्ठ ले औपचारिक रूपमा प्रमाणपत्र हस्तान्तरण गरेका हुन् ।
अस्पताल स्थापना भएको लामो समयपछि प्राप्त यस उपलब्धिलाई संस्थाले गुणस्तरीय स्वास्थ्य सेवातर्फको महत्वपूर्ण सफलता मानेको छ । अस्पतालका प्रबन्ध निर्देशक शाहवनाज अंसारीले आईएसओ मान्यता प्राप्त भएसँगै अस्पताल अन्तर्राष्ट्रिय मापदण्डअनुसार सेवा प्रवाह गर्ने संस्थाका रूपमा स्थापित भएको बताए ।
उनले अस्पतालको व्यवस्थापन सुधार, सेवा गुणस्तर अभिवृद्धि तथा सम्पूर्ण टिमको निरन्तर मेहनतकै परिणामस्वरूप यो उपलब्धि हासिल भएको उल्लेख गरे । उनका अनुसार बिरामी उपचार प्रणालीलाई व्यवस्थित, प्रभावकारी र विश्वसनीय बनाउन अस्पतालले लामो समयदेखि गुणस्तर सुनिश्चितता तथा व्यवस्थापन सुधारका विभिन्न कार्यक्रम सञ्चालन गर्दै आएको छ ।
अस्पतालले स्वास्थ्य विभागबाट प्राप्त निर्देशनअनुसार औषधि उपचार सेवा, विभिन्न निकायले निर्धारण गरेका मापदण्डको कार्यान्वयन, बिरामी परीक्षण तथा निजी प्रयोगशालाको गुणस्तर परीक्षणसम्बन्धी कार्य नियमित रूपमा गर्दै आएको जनाएको छ ।
त्यसैगरी, नियामक निकायबाट हुने लेखापरीक्षण, स्वदेशी तथा आयातित औषधिको गुणस्तर परीक्षण र विश्लेषण, विश्लेषण विधिको प्रमाणीकरण तथा कुशल प्रयोगशाला अभ्याससम्बन्धी निरीक्षण र मूल्यांकनका कार्यहरूलाई समेत अस्पतालले प्राथमिकताका साथ अघि बढाउँदै आएको जनाएको छ । 
प्रतिक्रिया दिनुहोस् !