जलेश्वर (महोत्तरी), ३१ वैशाख । तलब तथा भत्ताको माग गर्दै प्रादेशिक अस्पताल जलेश्वरका अस्थायी करारका चिकित्सक तथा कर्मचारीहरूले आन्दोलन जारी राखेका छन् । अस्पतालमा कार्यरत अस्थायी करारका चिकित्सक तथा कर्मचारीहरूले तीन महिनादेखि तलब तथा भत्ता नपाएको भन्दै अस्पतालका सेवा बन्द गरेर आन्दोलन थालेका हुन् । आन्दोलनरत चिकित्सक तथा स्वास्थ्यकर्मीहरूले लामो समयदेखि पारिश्रमिक नपाउँदा दैनिक जीवनयापन नै कठिन बनेको बताएका छन् ।
उनीहरूका अनुसार बढ्दो महँगी र पेट्रोलियम पदार्थको मूल्यवृद्धिका कारण सवारी खर्च धान्नसमेत समस्या भइरहेको छ । महिनौँदेखि तलब तथा भत्ता नपाउँदा घरपरिवार चलाउन कठिन भएको चिकित्सक गनि आलमले बताए । उनले तलब तथा भत्ता उपलब्ध नगराइएसम्म अस्पतालमा सेवा नदिने चेतावनीसमेत दिए ।
चिकित्सक तथा स्वास्थ्यकर्मीहरू आन्दोलनमा उत्रिएपछि अस्पतालमा उपचारका लागि आउने बिरामीहरू प्रत्यक्ष प्रभावित भएका छन् । बिरामी परीक्षण तथा उपचार सेवा प्रभावित बनेपछि सेवाग्राहीले सास्ती भोग्नुपरेको छ ।
यता, डा. रवि श्रीवास्तवले आन्दोलनबारे मधेश प्रदेशको स्वास्थ्य तथा जनसंख्या मन्त्रालयलाई जानकारी गराइसकिएको बताए । उनका अनुसार तलबसम्बन्धी फाइल स्वास्थ्य मन्त्रालय हुँदै अर्थ मन्त्रालयसम्म पुगिसकेको छ र चाँडै तलब भुक्तानी हुने अपेक्षा गरिएको छ ।
अस्पताल प्रशासनका अनुसार आन्दोलनमा १०० शैय्याको अस्पतालका लागि अस्थायी दरबन्दीमा कार्यरत २२ जना तथा ५० शैय्याको अस्पतालका लागि अस्थायी दरबन्दीमा रहेका २५ जना गरी कुल ४७ जना विशेषज्ञ चिकित्सक, चिकित्सक तथा स्वास्थ्यकर्मी सहभागी छन् । आन्दोलनका कारण अस्पतालको नियमित स्वास्थ्य सेवा प्रभावित बनेको छ । 
प्रतिक्रिया दिनुहोस् !