वीरगंज (पर्सा), ३० वैशाख । वीरगंज–रक्सौल सीमाक्षेत्रमा लागू औषध दुर्व्यसन नियन्त्रण तथा सचेतना अभिवृद्धि गर्ने उद्देश्यले सशस्त्र प्रहरी बल नेपाल सीमा सुरक्षा गुल्म हे.क्वा. वीरगंज, पर्सा र ग्रीनसिटी सामुदायिक प्रहरी आदर्शनगरको संयुक्त आयोजनामा जनचेतनामूलक कार्यक्रम सम्पन्न गरिएको छ ।
सीमावर्ती क्षेत्रमा दैनिक आवतजावत गर्ने अटो रिक्सा चालकहरूलाई लक्षित गरी सञ्चालन गरिएको कार्यक्रममा लागू औषधको दुष्प्रभाव, यसको सामाजिक असर तथा नियन्त्रणका उपायबारे विस्तृत जानकारी प्रदान गरिएको थियो । कार्यक्रममा विशेषगरी सीमाक्षेत्रमा लागू औषधको ओसारपसार र दुर्व्यसन रोकथाममा समुदायको भूमिका महत्वपूर्ण हुने विषयमा जोड दिइएको थियो ।
कार्यक्रम विकाश अधिकारी को प्रमुख आतिथ्यमा सम्पन्न भएको हो भने जयप्रकाश खेतान को अध्यक्षतामा आयोजना गरिएको थियो । कार्यक्रममा भारतीय एसएसबी का जवान, सामुदायिक प्रहरीका पदाधिकारी तथा ठूलो संख्यामा अटो रिक्सा चालकहरूको सहभागिता रहेको थियो ।
कार्यक्रमलाई सम्बोधन गर्दै डीएसपी अधिकारीले लागू औषध दुर्व्यसन समाजका लागि गम्भीर चुनौतीका रूपमा देखा परेको उल्लेख गर्दै सीमावर्ती क्षेत्रमा जनचेतना अभिवृद्धि गर्नु अत्यावश्यक रहेको बताए । उनले अटो चालकहरू दैनिक रूपमा समाजका विभिन्न वर्गसँग प्रत्यक्ष सम्पर्कमा रहने भएकाले लागू औषध नियन्त्रण अभियानमा उनीहरूको भूमिका प्रभावकारी हुन सक्ने धारणा व्यक्त गरे ।
त्यसैगरी अध्यक्ष खेतानले युवापुस्तालाई लागू औषध दुर्व्यसनबाट जोगाउन प्रहरी, समुदाय र सरोकारवाला निकायबीच सहकार्य अपरिहार्य रहेको बताए । समाजलाई सुरक्षित, स्वस्थ र सभ्य बनाउने उद्देश्यसहित यस्ता जनचेतनामूलक कार्यक्रमलाई आगामी दिनमा पनि निरन्तरता दिइने उनले जानकारी दिए ।
कार्यक्रममा सहभागी अटो रिक्सा चालकहरूलाई लागू औषध सेवन तथा ओसारपसारसँग सम्बन्धित कानुनी कारबाही, स्वास्थ्यमा पर्ने नकारात्मक असर तथा सामाजिक दुष्परिणामबारे सचेत गराइएको थियो । साथै कुनै पनि शंकास्पद गतिविधि वा अवैध कारोबार देखिएमा तत्काल प्रहरीलाई जानकारी गराउन आयोजकले आग्रह गरेको जनाएको छ । 
प्रतिक्रिया दिनुहोस् !