वीरगंज (पर्सा), २९ वैशाख । मधेशवादी आन्दोलनका अग्रणी नेता स्वर्गीय रामजन्म तिवारीको २७औँ स्मृति दिवस वीरगंजमा मनाइएको छ । वीरगंजस्थित घण्टाघरमा रहेको स्व. तिवारीको सालिक परिसरमा आयोजित कार्यक्रममा विभिन्न राजनीतिक, सामाजिक तथा बौद्धिक व्यक्तित्वहरूको उल्लेखनीय सहभागिता रहेको थियो ।
प्रोफेसर भाग्यनाथ गुप्ताको अध्यक्षतामा सम्पन्न कार्यक्रममा मधेशवादी आन्दोलनसँग आबद्ध विभिन्न व्यक्तित्वहरूको उपस्थिति रहेको थियो । कार्यक्रममा अधिवक्ता सुरेन्द्र कुर्मी, अधिवक्ता पन्नालाल गुप्ता, शशी कपूर मियाँ, नेजामुदिन समानी, शिव पटेल, शम्भु गुप्ता, श्याम गुप्ता, अखिलेश प्रसाद लगायत स्व. तिवारीका पुत्र अधिवक्ता आशुतोष तिवारी, परिवारजन, अनुयायी तथा सञ्चारकर्मीहरूको सहभागिता रहेको थियो ।
सहभागीहरूले स्व. तिवारीको सालिकमा माल्यार्पण तथा पुष्प अर्पण गर्दै उहाँले देखाएको मार्गमा अघि बढ्ने प्रतिबद्धता व्यक्त गरेका थिए । उनीहरूले अधिकार सम्पन्न मधेश र समृद्ध नेपालको निर्माणका लागि स्व. तिवारीको संघर्षलाई प्रेरणाका रूपमा लिने बताए ।
कार्यक्रमलाई सम्बोधन गर्दै अधिवक्ता सुरेन्द्र कुर्मीले स्व. रामजन्म तिवारीलाई मधेशी समुदायको हक–अधिकारका लागि पहिलोपटक सशक्त आवाज उठाउने योद्धाका रूपमा स्मरण गरे । उनले २००७ सालको क्रान्तिदेखि पञ्चायती व्यवस्थाविरुद्धको आन्दोलनसम्म स्व. तिवारीले निरन्तर संघर्ष गरेको उल्लेख गर्दै विभिन्न समयमा जेल जीवन बिताउनुपरे पनि कहिल्यै आफ्नो अडानबाट विचलित नभएको बताए ।
उनले २०४६ सालको जनआन्दोलनमा पनि स्व. तिवारीले अग्रपंक्तिमा रहेर नेतृत्वदायी भूमिका खेलेको स्मरण गरे । नेपाल सद्भावना परिषद्लाई नेपाल सद्भावना पार्टीका रूपमा विस्तार गरी मधेशी मुद्दालाई राष्ट्रिय राजनीतिमा स्थापित गराउन उहाँको महत्वपूर्ण योगदान रहेको उनको भनाइ थियो । चुनावपछि स्वयं मन्त्री नबनी गजेन्द्र नारायण सिंहलाई मन्त्री बनाएर मधेशी मुद्दालाई संसदसम्म पुर्याउन त्यागपूर्ण भूमिका खेलेको पनि उनले उल्लेख गरे ।
कार्यक्रमका अध्यक्ष प्रो. भाग्यनाथ गुप्ताले २००७ सालदेखि नै मधेश र मधेशी समुदायको पक्षमा बुलन्द आवाज उठाउने पहिलो योद्धा स्व. रामजन्म तिवारी रहेको बताए । उनले तराई कांग्रेसमार्फत मधेशी समुदायमाथिको विभेदविरुद्ध नेपाली कांग्रेस सरकार तथा तत्कालीन राजा त्रिभुवनसमक्ष समेत आवाज उठाएको स्मरण गरे ।
प्रो. गुप्ताले राजा महेन्द्र ले २०१६ सालमा जननिर्वाचित सरकार हटाएर सत्ता आफ्नो हातमा लिएपछि स्व. तिवारीले त्यसको कडा विरोध गरेको बताए । साथै पञ्चायती व्यवस्थाका क्रममा हर्क गुरुङको बसाइँसराइ सम्बन्धी प्रतिवेदन तथा मधेशविरोधी नीतिविरुद्ध आवाज उठाउँदा पटक–पटक जेल जानुपरेको प्रसंग पनि उनले स्मरण गरे ।
कार्यक्रममा स्वागत मन्तव्य आशुतोष तिवारीले दिएका थिए भने सञ्चालन वीरगंज कपडा बैंकका अध्यक्ष तथा सञ्चारकर्मी लालबाबु सिंहले गरेका थिए ।
प्रतिक्रिया दिनुहोस् !