वीरगंज (पर्सा), २७ वैशाख । जिल्ला प्रहरी कार्यालय पर्साले मोटरसाइकल चोरी गर्ने प्रयासमा संलग्न एक युवकलाई नियन्त्रणमा लिएको छ । पक्राउ पर्नेमा अकतर हुसेन रहेका छन् । प्रहरीका अनुसार वीरगंज महानगरपालिका–१३ निवासी २० वर्षीय हुसेनलाई मोटरसाइकल चोरी गर्दै गरेको अवस्थामा स्थानीयवासी र प्रहरीको संयुक्त टोलीले पक्राउ गरेको हो ।
गत वैशाख २५ गते साँझ करिब ७ बजेतिर बारा जिल्लाको जितपुर सिमरा उपमहानगरपालिका–७ निवासी ३२ वर्षीय दिपेन्द्र कुमार गुप्ताको नाममा दर्ता रहेको प्र.२–०३–०१९ प ६३५० नम्बरको २२० सीसी क्षमताको कालो–रातो रंगको पल्सर मोटरसाइकल वीरगंज–१३ स्थित नारायणी यातायात कार्यालय अगाडि पार्किङ गरिएको थियो ।
सोही क्रममा मोटरसाइकलको लक तोडेर चोरी गरी लैजान खोजिएको अवस्थामा स्थानीयले शंका गरी प्रहरीलाई खबर गरेका थिए । त्यसपछि प्रहरी र स्थानीयवासीको सक्रियतामा मोटरसाइकलसहित अकतर हुसेनलाई नियन्त्रणमा लिन सफल भएको प्रहरीले जनाएको छ । जिल्ला प्रहरी कार्यालय पर्साका प्रवक्ता प्रहरी नायब उपरीक्षक हरि बहादुर बस्नेतका अनुसार पक्राउ परेका हुसेनमाथि चोरी सम्बन्धी कसूरमा थप अनुसन्धान प्रक्रिया अघि बढाइएको छ । 
प्रतिक्रिया दिनुहोस् !