वीरगंज (पर्सा), २४ वैशाख । उच्च अदालत जनकपुरको अस्थायी इजलास वीरगंजले नेपाली कम्युनिष्ट पार्टी (नेकपा) का केन्द्रीय सदस्य तथा नेता मनोज चौधरीलाई धरौटीमा रिहा गर्न आदेश दिएको छ ।
फागुन २१ गते सम्पन्न प्रतिनिधि सभा निर्वाचनका क्रममा पर्सा क्षेत्र नम्बर २ बाट नेकपाका उम्मेदवार रहेका चौधरीलाई निर्वाचनको दुई दिनअघि सवारीसाधनमा विस्फोटक पदार्थसहित पक्राउ गरिएको थियो । विस्फोटक पदार्थ तथा निर्वाचन सम्बन्धी कसुर मुद्दामा पुर्पक्षका लागि हाल वीरगंज कारागारमा रहेका चौधरीलाई उच्च अदालतले पर्सा जिल्ला अदालतको चैत १२ गतेको थुनामा पठाउने आदेश बदर गर्दै २ लाख ५० हजार रुपैयाँ धरौटीमा रिहा गर्न आदेश दिएको हो ।
उच्च अदालत जनकपुर अस्थायी इजलास वीरगंजका सूचना अधिकारी ध्रुव सुबेदीका अनुसार इजलास नम्बर १ का न्यायाधीश गोकर्ण डाँगी र दुर्गा प्रसाद ढुंगेलको संयुक्त इजलासले उक्त आदेश गरेको हो । त्यसै मुद्दामा संलग्न अन्य प्रतिवादी सत्यनारायण दास थारु र सुरज कार्कीको हकमा भने पर्सा जिल्ला अदालतकै आदेश सदर भएको छ । चौधरीको तर्फबाट अधिवक्ता रामचन्द्र सिंह र सुधिर कुमार कर्णले बहस गरेका थिए भने सरकारी पक्षबाट उपन्यायाधिवक्ता बुधिलाल श्रेष्ठले बहस गरेका थिए ।
यसअघि पर्सा जिल्ला अदालतले गत चैत १२ गते चौधरीलाई पुर्पक्षका लागि थुनामा पठाउने आदेश गरेको थियो भने अन्य तीन जनासँग धरौटी माग गरिएको थियो । उक्त आदेशमा असन्तुष्टि जनाउँदै चौधरी पक्ष उच्च अदालत पुगेको थियो ।
यसैबीच, चौधरीसँगै पक्राउ परेका पर्सागढी नगरपालिका–३ का सत्यनारायण दास थारु, धनुषाधाम नगरपालिका निवासी सुरज कार्की तथा सवारी चालक बाराको प्रसौनी गाउँपालिका–४ का सहाब आलम अन्सारीलाई जिल्ला अदालतले धरौटीमा रिहा गर्न आदेश दिएको थियो । 
प्रतिक्रिया दिनुहोस् !