वीरगंज (पर्सा), २३ वैशाख । वीरगंज महानगरपालिका–१० घडिअर्वाबाट हराएका दुई किशोरीलाई नेपाल-भारत प्रहरीको समन्वयमा सकुशल उद्दार गरी स्वदेश फर्काइएको छ । हराएको दुई दिनपछि भारतको बिहारस्थित छपरा रेल्वे स्टेशनबाट उनीहरूलाई फेला पारेर मंगलबार साँझ वीरगंज ल्याइएको हो ।
हराउनेमा स्थानीय दीपेन्द्र कानुकी १४ वर्षीया छोरी आर्या गुप्ता र विनोद सहनीकी १४ वर्षीया छोरी रिद्धि सिद्धी (नाव्या) सहनी रहेका छन् । उनीहरू सोमबार दिउँसो करिब ३ः३० बजे ट्युसन पढ्न जाने भन्दै घरबाट निस्किएका थिए । साँझसम्म पनि घर नफर्किएपछि परिवारले प्रहरीलाई खबर गरेका थिए ।
खोजतलासका क्रममा नेपाल प्रहरीले भारतीय प्रहरीसँग समन्वय गर्दै उनीहरूको लोकेसन पत्ता लगाउन सफल भएको थियो । त्यसपछि भारतीय प्रहरीको सहयोगमा छपरा रेल्वे स्टेशनबाट उनीहरूलाई नियन्त्रणमा लिई सुरक्षित रूपमा उद्दार गरिएको जिल्ला प्रहरी कार्यालय पर्साका प्रहरी नायब उपरीक्षक राजु कार्कीले जानकारी दिए । उद्दारपछि उनीहरूलाई वीरगंज ल्याई जिल्ला प्रहरीको सेफ हाउसमा राखेर आवश्यक प्रक्रिया पूरा गरी बुधबार अभिभावकको जिम्मा लगाइएको उनले बताए ।
प्रहरी अनुसन्धानअनुसार रिद्धि सिद्धी वीरगंजस्थित इस्कोन कार्यालयमा आउजाउ गर्ने गरेकी थिइन् र उनले आर्यालाई भारतको मथुरा–वृन्दावन घुम्न जाने प्रस्ताव राखेपछि दुवै जना घरबाट निस्किएका थिए । तर ट्युसन नजाँदै उनीहरू सीधै रक्सौल रेल्वे स्टेशन पुगेका थिए । त्यहाँबाट रेल चढेर उनीहरू नरकटियागञ्ज, त्यसपछि गोरखपुर हुँदै मुजफ्फरपुर पुगे र अन्ततः छपरा स्टेशनमा ओर्लिएका थिए ।
यात्राका क्रममा मथुरा पुग्न आवश्यक भाडा नपुगेपछि रिद्धिले आफ्नी बहिनीको मोबाइलमा क्यूआर कोड पठाएर सहयोग मागेकी थिइन् । उक्त जानकारी पर्सा क्षेत्र नं. २ का सांसद सुशील कानु मार्फत प्रहरीमा पुगेपछि खोजी कार्य तीव्र बनाइएको थियो । प्रहरी उपरीक्षक सुदीपराज पाठकको समन्वयमा भारतीय सुरक्षाकर्मीसँग सहकार्य गरी अन्ततः उनीहरूको अवस्थिति पत्ता लगाइएको हो ।
उद्दारपछि भारतीय प्रहरीले आर्या गुप्ताका काका लालबाबु कानु र स्थानीय युवा नेता लखन गुप्ताको जिम्मामा दुवै किशोरीलाई बुझाएको थियो । त्यसपछि उनीहरूलाई सुरक्षित रूपमा नेपाल ल्याइएको प्रहरीले जनाएको छ । यस घटनाले अभिभावकलाई बालबालिकाको गतिविधिप्रति थप सचेत रहनुपर्ने सन्देश दिएको छ भने सीमा क्षेत्रमा हुने आवागमनमा पनि सतर्कता आवश्यक देखिएको छ । 
प्रतिक्रिया दिनुहोस् !