वीरगंज (पर्सा), २३ वैशाख । वीरगंज महानगरपालिका–१४ बहुअरीस्थित मदरसा तौहिदुल इस्लाम सलफियामा अध्ययनरत विद्यार्थीहरूलाई लक्षित गरी महिला हिंसा र ट्राफिक सचेतनासम्बन्धी अभिमुखीकरण कार्यक्रम सम्पन्न गरिएको छ । समुदाय–प्रहरी साझेदारी कार्यक्रमअन्तर्गत आयोजना गरिएको उक्त कार्यक्रममा करिब १५० जना छात्र–छात्राको सहभागिता रहेको थियो ।
कार्यक्रममा जिल्ला ट्राफिक प्रहरी कार्यालय पर्साका प्रमुख युवराज कटवाल तथा जिल्ला प्रहरी कार्यालय पर्साकी प्रहरी निरीक्षक सोनी नेमाफुकीले सहजीकरण गर्दै विद्यार्थीहरूलाई विभिन्न सामाजिक तथा ट्राफिकसम्बन्धी विषयमा जानकारी गराएका थिए । सहजीकरणका क्रममा बालविवाह र दाइजो प्रथाले समाजमा पारिरहेको नकारात्मक असरबारे सचेत गराइएको थियो भने बालबालिकामाथि हुने घरेलु हिंसा तथा ग्रामीण क्षेत्रमा देखिने महिला हिंसा न्यूनीकरणका उपायबारे पनि विस्तृत रूपमा जानकारी दिइयो ।
त्यस्तै, सडक सुरक्षालाई ध्यानमा राख्दै ट्राफिक नियमको पालना, ट्राफिक संकेतको बुझाइ तथा सुरक्षित रूपमा सडक पार गर्ने तरिकाबारे पनि विद्यार्थीहरूलाई व्यवहारिक जानकारी प्रदान गरिएको कार्यक्रम संयोजक दिलीपराज कार्कीले बताए । स्टार युथ क्लबका अध्यक्ष सम्साद अलीको अध्यक्षतामा सम्पन्न उक्त कार्यक्रममा ट्राफिक प्रहरी निरीक्षक कटवाल प्रमुख अतिथिका रूपमा सहभागी थिए । साथै मदरसाका प्रधानाध्यापक अकबर हवारी, स्थानीय समाजसेवी, युवा अभियान्ता लगायतको पनि उल्लेख्य उपस्थिति रहेको थियो ।
कार्यक्रमले विद्यार्थीहरूमा सामाजिक सचेतना अभिवृद्धि गर्नुका साथै सुरक्षित र जिम्मेवार नागरिक बन्न प्रेरित गरेको आयोजकले जनाएको छ । 
प्रतिक्रिया दिनुहोस् !