वीरगंज (पर्सा), २२ वैशाख । पर्सामा अवैध घरेलु मदिरा भट्टीमाथि प्रहरीले कारबाही गर्दै ठूलो परिमाणमा मदिरा नष्ट गरेको छ । जिल्ला प्रहरी कार्यालय पर्साका अनुसार विशेष सूचनाको आधारमा छिपरमाई गाउँपालिका–२ टिउकी क्षेत्रमा अवैध रूपमा सञ्चालन भइरहेको घरेलु मदिरा भट्टी फेला परेको हो । मिति २०८३ वैशाख २२ गते दिउँसो करिब २ः२० बजे गरिएको उक्त कारबाहीमा प्रहरी सक्रिय भएको थियो ।
प्रहरी चौकी टिउकी र प्रहरी चौकी बूढगाईबाट खटिएको संयुक्त टोलीले छापामारी गर्दै भट्टी नियन्त्रणमा लिएको थियो । कारबाहीका क्रममा प्रहरीले सो भट्टीमा प्रयोग हुँदै आएको उपकरणहरू तोडफोड गर्दै नष्ट गरेको जनाएको छ । त्यस क्रममा करिब ६०० लिटर कच्चा पदार्थ र २०० लिटर तयारी घरेलु मदिरा बरामद गरिएको प्रहरीले जानकारी दिएको छ । बरामद गरिएको सबै सामग्रीलाई स्थलमै नष्ट गरिएको जिल्ला प्रहरी कार्यालय पर्साका प्रवक्ता प्रहरी नायब उपरीक्षक राजु कार्कीले जानकारी दिए ।
अवैध मदिरा उत्पादन तथा बिक्रीवितरण नियन्त्रण गर्ने अभियानलाई निरन्तरता दिइएको प्रहरीले जनाएको छ । प्रहरीले यस्ता गैरकानुनी गतिविधि देखिएमा तत्काल जानकारी गराउन सर्वसाधारणलाई समेत आग्रह गरेको छ ।
प्रतिक्रिया दिनुहोस् !