वीरगंज (पर्सा), ९ वैशाख । विश्व हिन्दू परिषद् नेपालले बारामा आयोजना हुन लागेको मुस्लिम समुदायको धार्मिक भेला ‘इज्तिमा’ मा विदेशी नागरिकहरूको सहभागिताले राष्ट्रिय सुरक्षामा चुनौती थप्ने भन्दै त्यसमा कडाइ गर्न माग गरेको छ । परिषद्ले बुधबार जिल्ला प्रशासन कार्यालय बारा र पर्सामा छुट्टाछुट्टै ध्यानाकर्षण पत्र बुझाउँदै विशेषगरी तेस्रो मुलुकका नागरिकहरूको अवैध प्रवेश तथा सहभागिता रोक्न प्रशासनको ध्यानाकर्षण गराएको हो ।
बारामा सहायक प्रमुख जिल्ला अधिकारी छविरमण भट्टराई र पर्सामा प्रमुख जिल्ला अधिकारी भोला दाहाललाई परिषद्ले ज्ञापनपत्र बुझाएको जनाएको छ । आगामी वैशाख ११ देखि १४ गतेसम्म बाराको जितपुर–सिमरा उपमहानगरपालिका–२४ हरपुरमा आयोजना हुन लागेको उक्त धार्मिक भेलामा पाकिस्तान, बङ्गलादेशलगायत देशबाट सहभागी आउने तयारी रहेको सूचनाप्रति परिषद्ले आपत्ति जनाएको छ ।
ध्यानाकर्षण पत्रमा धार्मिक भेलाको आवरणमा छिमेकी राष्ट्र तथा अन्य तेस्रो मुलुकबाट अवैध रूपमा विदेशीहरू नेपाल प्रवेश गर्ने र लुकिछिपी बस्ने जोखिम रहेको उल्लेख गरिएको छ । यस्ता गतिविधिले राष्ट्रिय सुरक्षा संयन्त्रमा असर पर्न सक्ने परिषद्को भनाइ छ । विशेषगरी बङ्गलादेश र म्यानमारबाट आएका रोहिङ्ग्या समुदायका व्यक्तिहरूले यस्ता कार्यक्रमको फाइदा उठाउँदै नेपाल प्रवेश गर्न सक्ने सम्भावनाप्रति सचेत रहन प्रशासनसँग आग्रह गरिएको छ ।
नेपाल–भारत सीमा क्षेत्रको संवेदनशीलतालाई दृष्टिगत गर्दै परिषद्ले अवैध विदेशी घुसपैठ नियन्त्रण गर्न तथा साम्प्रदायिक सद्भाव कायम राख्न आवश्यक कदम चाल्न माग गरेको छ । साथै विदेशी सहभागीहरूको कडाइका साथ छानबिन तथा नियन्त्रण गर्नुपर्ने उल्लेख गरिएको छ ।
प्रतिक्रिया दिनुहोस् !