वीरगंज (पर्सा), ९ वैशाख । भारतसँगको खुला सीमाबाट करिब ४० किलोमिटर भित्र पर्ने नेपालमा पछिल्ला दिनहरूमा तब्लिगी जमातका गतिविधि तीव्र बन्दै गएपछि सुरक्षा चिन्ता बढ्न थालेको छ । विशेषगरी मधेस प्रदेश का विभिन्न जिल्लामा धार्मिक जमघट विस्तार हुँदै जाँदा सुरक्षा निकायले निगरानी कडा बनाएका छन् ।
आगामी अप्रिल २०२६ मा बारा जिल्ला अन्तर्गत जीतपुर–सिमरा उपमहानगरपालिका–२४ हरपुर बलुवामा तीन दिने ठूलो इस्लामिक सम्मेलन (इज्तिमा) गर्ने तयारी तीव्र छ । उक्त कार्यक्रममा नेपालसँगै भारत, पाकिस्तान र बंगलादेशबाट ठूलो संख्यामा सहभागी आउने सम्भावना व्यक्त गरिएको छ, जसले सुरक्षा व्यवस्थापनलाई थप संवेदनशील बनाएको छ ।
सुरक्षा विज्ञहरूका अनुसार तेस्रो मुलुकका नागरिकको उपस्थितिले यस्ता कार्यक्रमलाई थप जटिल बनाउँछ । खुला सीमा व्यवस्थाका कारण आवतजावत सहज हुने भएकाले सम्भावित अवाञ्छित गतिविधि रोक्न अग्रिम सूचना संकलन र कडा निगरानी अपरिहार्य भएको उनीहरूको भनाइ छ। विशेषगरी सीमावर्ती क्षेत्रमा सुरक्षा सतर्कता बढाउन सुझाव दिइएको छ ।
यसअघि सन् २०१९ मा सप्तरी जिल्लाको बोदेबरसैनमा आयोजना गरिएको ‘आलामी तब्लिगी इज्तिमा’पछि तराई–मधेस क्षेत्रमा साम्प्रदायिक तनाव बढेको विश्लेषण सार्वजनिक भएको थियो । त्यतिबेला करिब तीन लाखभन्दा बढी मुस्लिम समुदायको उपस्थिति रहेको र विदेशी सहभागिता नियन्त्रण गर्न विशेष सुरक्षा संयन्त्र परिचालन गरिएको थियो ।
सुरक्षा स्रोतका अनुसार बंगलादेश र पाकिस्तानबाट हरेक वर्ष साना समूहमा तब्लिगी जमातका सदस्य नेपाल प्रवेश गरी मस्जिद र मदरसामा बस्दै धार्मिक प्रचार गर्ने गरेका छन् । यस्ता गतिविधिले सामाजिक सद्भावमा असर पार्न सक्ने आशंकासहित निगरानी बढाइएको छ । हालै बंगलादेशबाट आएको आठ सदस्यीय टोली विभिन्न जिल्लामा पुगिसकेको र बारा इज्तिमामा सहभागी हुने तयारीमा रहेको बताइएको छ। त्यस्तै, भारतबाट मौलाना सादको नेतृत्वमा अर्को समूह आउने सम्भावना पनि जनाइएको छ ।
नेपालमा सन् १९८५ देखि सक्रिय इस्लामी संघ (आईएसएन) अन्तर्गत विभिन्न धार्मिक समूहहरू प्रचारमा संलग्न छन् । यद्यपि, यस्ता गतिविधि केवल धार्मिक अभ्यासमै सीमित छन् वा त्यसले सुरक्षा चुनौती निम्त्याउँछ भन्ने विषयमा बहस अझै जारी छ । सुरक्षा निकायले कार्यक्रम शान्तिपूर्ण रूपमा सम्पन्न गराउन आवश्यक सबै तयारी अघि बढाइरहेको जनाउँदै विदेशी सहभागिता, खुला सीमा र विगतका अनुभवलाई ध्यानमा राख्दै उच्च सतर्कता अपनाइएको स्पष्ट पारेका छन् ।
प्रतिक्रिया दिनुहोस् !