वीरगंज (पर्सा), २९ चैत । वीरगंजमा कुखुरा फर्ममा कार्यरत एक कामदारमाथि अमानवीय ढंगले कुटपिट गरिएको घटनामा संलग्न साहु पक्राउ परेका छन् । वीरगंज महानगरपालिका वडा नं.– १७ निवासी ३० वर्षीय सकिन लाल देवानलाई प्रहरीले नियन्त्रणमा लिएको जिल्ला प्रहरी कार्यालय पर्साका प्रवक्ता प्रहरी नायब उपरीक्षक हरि बहादुर बस्नेतले जानकारी दिएका छन् ।
परवानीपुर प्रहरी चौकी नजिक सञ्चालनमा रहेको ‘साबिर फ्रेस हाउस एण्ड सप्लायर्स’ का सञ्चालक देवानले आफ्नै पसलमा काम गर्ने २० वर्षीय नुर आलम देवानमाथि लठ्ठी प्रयोग गरी निर्घात कुटपिट गरेको दृश्य सामाजिक सञ्जालमा सार्वजनिक भएपछि घटना बाहिरिएको हो । भिडियोमा साहु देवानले कामदारमाथि कुखुरा चोरी गरी बेच्ने आरोप लगाउँदै लगातार प्रहार गरिरहेको स्पष्ट देखिन्छ ।
घटना सार्वजनिक भएसँगै सामाजिक सञ्जालदेखि सरोकारवाला निकायसम्म व्यापक आलोचना भएको छ । मानव अधिकारको गम्भीर उल्लंघन भएको भन्दै दोषीलाई कडा कानुनी कारबाही गर्नुपर्ने माग उठेको छ । प्रहरीले आरोपीलाई नियन्त्रणमा लिएर घटनाको विस्तृत अनुसन्धान अघि बढाएको जनाएको छ । 
प्रतिक्रिया दिनुहोस् !