काठमाडौँ, २६ चैत । त्रिभुवन अन्तर्राष्ट्रिय विमानस्थल भन्सार कार्यालयसँग जोडिएको बहुचर्चित सुन तस्करी प्रकरणमा अख्तियार दुरुपयोग अनुसन्धान आयोगले ठूलो कदम चालेको छ । पूर्वसभामुख कृष्णबहादुर महरा, उनका छोरा राहुल महरा सहित २९ जनाविरुद्ध भ्रष्टाचार मुद्दा दायर गरिएको छ, जसले प्रकरणलाई थप गम्भीर मोडमा पुर्याएको छ ।
अख्तियारले भन्सार प्रशासनतर्फ प्रमुख भन्सार प्रशासक अरुण पोखरेल, प्रमुख भन्सार अधिकृतहरू मुक्तिप्रसाद श्रेष्ठ र अम्बिकाप्रसाद खनाल, साथै भन्सार अधिकृतहरू रमेशकुमार खतिवडा र सुबेन्द्र श्रेष्ठलाई प्रत्यक्ष संलग्न देखाउँदै मुद्दा चलाएको छ । यससँगै नासुहरू सुवर्णाप्रभा केसी, भुवनराज घिमिरे, उमेशप्रसाद कोइराला, रेवन्त खड्का र मधुसुदन पोखरेल पनि आरोपको घेरामा परेका छन् ।
यस प्रकरणमा महरा र उनका छोरा राहुलसँगै निर्मलकुमार विक, लोकेन्द्रकुमार पौडेल, दिपेश बस्नेत, गोपाल सुवेदी, दिनेश बस्नेत, वेदप्रकाश अग्रवाल, रामकेशव थापा, अमृत कार्की र निमा गुरुङमाथि पनि मुद्दा दायर गरिएको छ । त्यस्तै प्रेरणा थापा, ललिता थापा, दिपिका थापा लगायत विदेशी नागरिकहरू चिनियाँ लि हाङ सोङ, दोजिङ वाङ, बेल्जियमका दावा छिरिङ तथा भारतीय नागरिक साहेव राव पाण्डुरङ पनि अभियोगमा समेटिएका छन् । डेक्टर ट्राभल्स एण्ड टुर्स प्रालि विरुद्ध समेत कारबाही अघि बढाइएको छ ।
यो प्रकरणको जरो १० पुस २०७९ मा देखिएको थियो, जब फ्लाई दुबईमार्फत आएका चिनियाँ नागरिक लि हाङ सोङले दुई वटा सुटकेसभित्र ७३० वटा इलेक्ट्रोनिक चुरोट (भेप) ल्याएका थिए । ती भेपभित्र सुन लुकाएर तस्करी गरिएको र त्यसमा भन्सार कर्मचारीहरूको मिलेमतो रहेको अख्तियारको ठहर छ । शंकास्पद वस्तुको अनिवार्य भौतिक जाँच नगरी तस्करहरूसँगको साँठगाँठमा चेकजाँच नै टारिएको आरोप पनि लगाइएको छ ।
अख्तियारका अनुसार बरामद सामग्रीलाई नियमअनुसार गोदाममा राख्नुपर्नेमा त्यसो नगरी प्रमुख भन्सार अधिकृतकै कार्यकक्षमा राखिएको थियो । यसबीच सुन छुटाउने समूहसँग अस्वाभाविक भेटघाट र बारम्बार फोन सम्पर्क भएको तथ्य पनि अनुसन्धानले देखाएको छ । अझ गम्भीर कुरा के भने, शंकास्पद सामग्री करिब १९ दिनसम्म भन्सारमै रोकेर पछि मात्र मुद्दा तथा लिलामी शाखामा पठाइएको र त्यस अवधिमा सीसीटीभी कभरेज नभएको स्थानमा सारिएको आरोप छ ।
अख्तियारले यो प्रकरणमा ८ किलो ४८० ग्राम सुन तस्करी भएको निष्कर्ष निकाल्दै करिब ७ करोड ७८ लाख ६८ हजार रुपैयाँ बराबरको हिनामिना भएको दाबी गरेको छ । भन्सारका कर्मचारीहरूलाई प्रत्यक्ष भ्रष्टाचारको आरोप लगाइएको छ भने महरा, उनका छोरा राहुल लगायतलाई मतियारको रूपमा अभियुक्त बनाइएको छ ।
अख्तियारले विशेष अदालतमा दायर गरेको मुद्दामा महरासहितका प्रतिवादीसँग ७ करोड ७८ लाख रुपैयाँ बिगो माग गरिएको छ । चिनियाँ गिरोहसँगको सम्बन्ध र आर्थिक कारोबारको प्रमाण फेला परेपछि मात्रै मुद्दा अघि बढाइएको जनाइएको छ । २०७९ सालमै भेपको आवरणमा सुन भित्र्याउने प्रयास भन्सारमै समातिएपछि सुरु भएको अनुसन्धानले अन्ततः उच्च तहसम्मको संलग्नता उजागर गरेको हो । यस घटनाले नेपालमा संगठित सुन तस्करी र प्रशासनिक मिलेमतोबारे गम्भीर प्रश्न उठाएको छ । 
प्रतिक्रिया दिनुहोस् !