सिरहा, २१ चैत । सिरहामा माध्यमिक शिक्षा परीक्षा (एसईई) को दोस्रो दिन नेपाली विषयको परीक्षा सञ्चालन भइरहेका बेला प्रशासनले कडा अनुगमन गर्दै परीक्षा अनुशासनमा सख्ती देखाएको छ । शुक्रबार गरिएको निगरानीका क्रममा जिल्लाका ९ वटा परीक्षा केन्द्रबाट १९४ थान मोबाइल फोन र २ वटा स्मार्ट वाच बरामद गरिएको शिक्षा विकास तथा समन्वय इकाईले जानकारी दिएको छ ।
परीक्षा मर्यादा उल्लंघन भएको पुष्टि भएपछि मोबाइलसहित पक्राउ परेका २ जना केन्द्राध्यक्ष र ४ जना निरीक्षकलाई तत्काल निष्कासन गरिएको छ । निष्कासित हुनेमा बालमन्दिर माध्यमिक विद्यालयका केन्द्राध्यक्ष संजय यादव तथा जनता माध्यमिक विद्यालय फुलबरियाका केन्द्राध्यक्ष रामकिशोर यादव रहेका छन् । इकाइ प्रमुख दीपक राज कनौलीका अनुसार सुरेन्द्र पौडेलको नेतृत्वमा खटिएको अनुगमन टोलीले परीक्षा अमर्यादित बनाउन खोजिएको गतिविधि देखेपछि तुरुन्त कारबाही अघि बढाएको हो ।
विगतमा सिरहाका परीक्षा केन्द्रहरूमा सेटिङ, प्रभाव र बिचौलियाको चलखेल देखिँदै आएको पृष्ठभूमिमा यस वर्ष त्यस्ता प्रवृत्ति दोहोरिन नदिन निगरानीलाई थप कडा बनाइएको उनले बताए । यस वर्ष सिरहा जिल्लाबाट कुल ११ हजार ३७ विद्यार्थी एसईई परीक्षामा सहभागी भएका छन् । तीमध्ये १० हजार ६२५ जना साधारण धार र ४१२ जना प्राविधिक धारका विद्यार्थी रहेका छन् । सहभागीमध्ये ५ हजार ३०८ छात्रा र ५ हजार ७२९ छात्र छन् । जिल्लाभर ५१ वटा परीक्षा केन्द्र तोकिएका छन् ।
राष्ट्रिय परीक्षा बोर्डका अनुसार एसईई परीक्षा चैत १९ देखि २९ गतेसम्म बिहान ८ बजेदेखि ११ बजेसम्म सञ्चालन भइरहेको छ । 
प्रतिक्रिया दिनुहोस् !