वीरगंज (पर्सा), १९ चैत । पर्साको जगरनाथपुर गाउँपालिका–६ आवराहास्थित धर्मशालामा निःशुल्क आँखा परीक्षण शिविर सम्पन्न भएको छ । रोटरी क्लब हेटौंडाको आयोजना र सामुदायिक आँखा अस्पताल हेटौंडाको प्राविधिक सहयोगमा सञ्चालन गरिएको उक्त शिविरबाट १२९ जना स्थानीय बासिन्दा लाभान्वित भएका छन् । युवा नेता बृजेश्वर प्रसाद चौधरीको अध्यक्षतामा सम्पन्न कार्यक्रममा प्रमोद सहनी प्रमुख अतिथिका रूपमा सहभागी भएका थिए ।
त्यस्तै, सेनालाल पटेल र समाजसेवी सुशील चौरसिया विशिष्ट अतिथिका रूपमा उपस्थित रहेका थिए । कार्यक्रममा रोटरी क्लबका अध्यक्ष प्रमेश प्रधान, कोषाध्यक्ष विकास श्रेष्ठ, नेत्र अधिकृत पूर्णिमा गुरुङ, वरिष्ठ नेत्र सहायक चन्द्रकान्ता चौधरी, आइ हेल्थ वर्कर जनक अवस्थी तथा शर्मिला बज्रगाईं लगायत स्थानीय सरोकारवालाको उल्लेखनीय सहभागिता देखिएको थियो ।
शिविरका क्रममा १२९ जनाको आँखाको जाँच गरिएकोमा २९ जनामा मोतियाबिन्दु पुष्टि भएको छ भने ३६ जनालाई निःशुल्क औषधि वितरण गरिएको आयोजकले जानकारी दिएको छ । मोतियाबिन्दु पहिचान भएका बिरामीहरूलाई शुक्रबार हेटौंडा लगिने, शनिबार शल्यक्रिया गरिने र आइतबार पुनः आवराहा फर्काइने कार्यतालिका तय गरिएको छ ।
कार्यक्रम सफल बनाउन सहयोग पुर्याउने सम्पूर्ण रोटरी क्लब परिवारप्रति अध्यक्ष चौधरीले आभार व्यक्त गरेका छन् । 
प्रतिक्रिया दिनुहोस् !