वीरगंज (पर्सा), १९ चैत । यस वर्षको माध्यमिक शिक्षा परीक्षा (एसइई) बिहीबारबाट सुरु भएको छ । पहिलो दिन विद्यार्थीले अनिवार्य अंग्रेजी विषयको परिक्षा दिएकाछन् । चैत १९ गते देखि सुरु भएको एसइइ परिक्षा चैत २९ गते सकिने कार्यतालिका छ । यस वर्ष परीक्षा सम्पन्न भएको बढीमा तीन दिनभित्र कपी जाँच गरिसक्ने योजना छ ।
यसैगरी ‘मार्कस्लिप प्रिन्ट’ गरी ‘ट्याब’मा चढाई खाममा ‘सिलबन्दी’ गरी गोप्य र सुरक्षित रूपमा शिक्षा विकास तथा समन्वय एकाइमा तीन दिनभित्र बुझाउनुपर्ने नयाँ व्यवस्था गरिएको छ । उत्तरपुस्तिका परीक्षक र संपरीक्षकलाई परीक्षण केन्द्रमा नै रहेर परीक्षण गर्न भनिएको छ । यस वर्ष एसइई परीक्षाको सामूहिक अनुगमनमा पनि रोक लगाएको छ ।
परीक्षा केन्द्र अनुगमनका नाममा विभिन्न सङ्घसङ्गठनका प्रतिनिधि हलमा प्रवेश गर्दा परीक्षा दिइरहेका परीक्षार्थीको लेखन कार्यमा अवरोध पुगेको गुनासो आएपछि सामूहिक अनुगमनमा रोक लगाइएको हो । अनुगमनका लागि प्रत्येक जिल्लामा प्रमुख जिल्ला अधिकारीको संयोजकत्वमा समिति गठन गरिएको छ । सोही समितिले मात्रै परिक्षाको अनुगमन गर्ने व्यवस्था गरिएको छ ।
यसबर्ष पर्सा जिल्लाबाट १० हजार ७०३ जना विद्यार्थी परिक्षामा सहभागी छन् । पर्सा जिल्लाका ७० वटा सामुदायिक र ८३ वटा संस्थागत समेत १५३ वटा विद्यालयबाट कुल १० हजार ७०३ जना विद्यार्थी परीक्षामा सहभागी भएकोे शिक्षा विकास तथा समन्वय इकाइ पर्साले जनाएको छ ।
यसैविच माध्यमिक शिक्षा परीक्षा (एसईई) को उत्तरपुस्तिका परीक्षण सुरु भएको खबर प्राप्त भएको छ । बिहीबारदेखि सुरु भएको एसईईको उत्तरपुस्तिका परीक्षण सुरु गरिएको परीक्षा नियन्त्रक टुकराज अधिकारीले बताए । बिहान ८ बजेदेखि ११ बजेसम्म परीक्षा सञ्चालन भएको थियो । पहिलो दिन अंग्रेजी विषयको परीक्षा भएको हो । शान्तिपूर्णरुपमा परीक्षा सकिएपछि उत्तरपुस्तिका परीक्षण सुरु भएको हो ।
यस वर्षको उत्तरपुस्तिका अन्य जिल्लामा नपठाइने
संघीय सरकारको निर्धेशन अनुसार पर्सा जिल्लामा यस वर्षको माध्यमिक शिक्षा परीक्षा (एसईई) को उत्तरपुस्तिका अब बाहिर जिल्लामा नपठाइने भएको छ । सरकारले परीक्षा सकिएको एक महिनाभित्रै नतिजा सार्वजनिक गर्ने लक्ष्य लिएको छ । सो अनुसार उत्तर पुस्तिका परिक्षणका लागि जिल्ला बाहिर नपठाउने भएको हो ।
शिक्षा विकास तथा समन्वय इकाइ समिति पर्साका इकाइ प्रमुख मोतीप्रसाद भट्टराइका अनुसार उत्तर पुस्तिका जाँच्न परीक्षण केन्द्रका रूपमा पर्सामा चारवटा केन्द्र तय भएको छ । जसमा नृसिंह मावि, सिद्धार्थ मावि, श्री नेरामवि श्रीपुर र त्रिजुद्ध मावि चयन रहेका छन् । परीक्षा सम्पन्न भएलगत्तै उत्तरकापी यही चारवटा परीक्षण केन्द्रमा पठाइने बताइएको छ ।
त्यसपछि छनौट भएका विषयगत शिक्षकले उक्त उत्तरपुस्तिकाको जाँच गर्ने व्यवस्था मिलाइएको छ । प्रत्येक विषयका लागि ५५ जना विषयगत शिक्षक छनोट गरिएको इकाई प्रमुख भट्टराइले जानकारी गराएका छन् । छनोट गरिएका शिक्षकहरूले तीन दिनभित्र कपी जाँच सक्नुपर्ने व्यवस्था गरिएको छ ।
स्थानीयस्तरमै कपी परीक्षण गर्ने नयाँ मोडेलले समय बचत हुनुका साथै नतिजा छिटो सार्वजनिक गर्न सहज हुने विश्वास गरिएको छ । उत्तरपुस्तिका जाँच गर्ने शिक्षकको मोबाइल भने बाहिर राख्ने र कसैसंग सम्पर्कमा बस्न नदिने कडा नीति लिइएको शिक्षा विकास तथा समन्वय इकाइ समितिले जनाएको छ । 
प्रतिक्रिया दिनुहोस् !