वीरगंज (पर्सा), १८ चैत । मधेश विश्वविद्यालयमा कार्यरत एक कर्मचारीमाथि छात्रामाथि अनैतिक सम्बन्धका लागि दबाब दिएको गम्भीर आरोप लागेपछि उनलाई प्रहरीले नियन्त्रणमा लिएको छ । पक्राउ पर्नेमा विश्वविद्यालयको डिन कार्यालयमा कार्यरत छैठौँ तहका अधिकृत मोहम्मद राजु राउत गद्दी रहेका छन् ।
बि.ए.एल.एल.बी. प्रथम वर्षमा अध्ययनरत एक छात्रासँग सुरुमा सहयोग गर्ने बहाना बनाउँदै नजिकिएका गद्दीले पछि फोन र सामाजिक सञ्जालमार्फत अनुपयुक्त सन्देश पठाएर मानसिक दबाब सिर्जना गरेका थिए । छात्राले प्रस्ताव अस्वीकार गरेमा परीक्षामा अंक घटाइदिने धम्की र स्वीकार गरेमा विभिन्न सुविधा दिने प्रलोभनसमेत दिएको उजुरीमा उल्लेख छ ।
पीडित छात्राले चैत १४ गते जिल्ला प्रशासन कार्यालय पर्सामा औपचारिक उजुरी दर्ता गराएपछि घटनाले मोड लिएको थियो । उजुरीपछि फरार रहेका गद्दीलाई जिल्ला प्रहरी कार्यालय पर्साको टोलीले खोजी गरी अन्ततः नियन्त्रणमा लिएको हो ।
घटनाबारे पर्सा प्रहरीले हालसम्म कुनै स्पष्ट आधिकारिक विवरण सार्वजनिक गरेको छैन । जिल्ला प्रहरी कार्यालय पर्साका प्रवक्ता प्रहरी नायब उपरीक्षक हरि बहादुर बस्नेतले विषय संवेदनशील भएकाले तत्काल केही बोल्न नसकिने बताएका छन् । यद्यपि, पक्राउ परेका गद्दीलाई बिहीबार जिल्ला अदालत पर्सामा उपस्थित गराइएको जानकारी बाहिरिएको छ, तर उनीविरुद्ध के कस्ता मुद्दा दर्ता भए भन्नेबारे अझै अस्पष्टता कायम छ ।
यस प्रकरणले पर्सा प्रहरीको कार्यशैलीमाथि प्रश्न उठाएको छ । सर्वसाधारणको हकमा तुरुन्तै सार्वजनिक गर्ने प्रचलन भएपनि यस घटनामा भने आरोपीलाई सार्वजनिक नगरिनु राजनीति प्रभावका कारण भएको हुन सक्ने चर्चा चुलिएको छ । श्रोतका अनुसार गद्दी मधेश प्रदेशका पूर्व मुख्यमन्त्री लालबाबु राउत गद्दीका आफन्त रहेको बताइएको छ ।
यता, घटनाले विश्वविद्यालय प्रशासनलाई समेत झस्काएको छ । उपकुलपति डा. दीपक बहादुर शाक्यले जारी गरेको विज्ञप्तिमा औपचारिक लिखित उजुरी नआएपनि सञ्चारमाध्यममा आएका विवरणप्रति गम्भीर ध्यानाकर्षण भएको उल्लेख गरिएको छ ।
विज्ञप्तिमा आरोपितको गतिविधि कानुनविपरीत र पदीय जिम्मेवारीको दृष्टिले गम्भीर भएको औंल्याउँदै निष्पक्ष र पारदर्शी अनुसन्धानमा पूर्ण सहयोग गर्ने प्रतिबद्धता व्यक्त गरिएको छ । 
प्रतिक्रिया दिनुहोस् !