पोखरा (कास्की), १७ चैत । पोखराको एकान्त जंगलछेउमा लुकेर आयोजना गरिएको ‘ट्रान्स पार्टी’माथि प्रहरीले मध्यरातमै ठूलो अपरेशन चलाएको छ । कास्की प्रहरीका अनुसार पोखरा महानगरपालिका–१८ सेदीस्थित बस्तीभन्दा टाढाको सुनसान घरमा स्वदेशी तथा विदेशी युवायुवतीहरू रमाइरहेको बेला आकस्मिक छापा मारिएको हो । प्रहरीले चारैतिरबाट घेरा हालेर छापा मार्दा अवैध रूपमा सञ्चालन भइरहेको उक्त पार्टीबाट ३८ जनालाई नियन्त्रणमा लिएको छ । तीमध्ये १२ जनाविरुद्ध कानुनी कारबाही अघि बढाउने तयारी गरिएको छ ।
कास्की प्रहरी प्रमुख एसपी नवीन कार्कीका अनुसार उक्त घर पोखरा–१८ का कृष्ण पराजुलीको पुरानो घर हो, जसलाई बमेन्द्र पुनसहितको समूहले भाडामा लिएर ट्रान्स पार्टी आयोजना गरेको थियो । छापाको क्रममा त्यहाँ लागुऔषधको खुलेआम कारोबार र सेवन भइरहेको पुष्टि भएको प्रहरीले जनाएको छ । ‘हामीले मध्यरातमै घेरा हालेर छापा मार्यौं, त्यसक्रममा लागुऔषधको बिक्री वितरण र सेवन भइरहेको स्पष्ट देखियो,’ एसपी कार्कीले बताए ।
प्रहरीका अनुसार पक्राउ परेकामध्ये ८ जनाको साथबाट विभिन्न प्रकारका लागुऔषध फेला परेको छ । तीमध्ये ६ जना विदेशी नागरिक रहेका छन् भने बाँकी स्वदेशी हुन् । प्रारम्भिक जाँच (स्क्रिनिङ)का क्रममा उनीहरूको साथबाट उच्च श्रेणीका लागुऔषध बरामद भएको हो । बरामद गरिएको पदार्थमा एमडीएमए, चरेस, कोकिनजस्तो देखिने सेतो धुलो, खात, खैरो हेरोइनजस्तो पदार्थ, ‘आइस’ (एम्फेटामिन समूह), गाँजा, म्याजिक मसरुम, एलएसडी कागज तथा तरल पदार्थसमेत रहेको प्रहरीले जनाएको छ ।
‘यस्ता उच्चस्तरका लागुऔषध सामान्य अवस्थामा विरलै भेटिन्छन्,’ एसपी कार्कीले भने, ‘केही झोलामा, केही ठोस रूपमा तयारी अवस्थामा राखिएको थियो ।’ लागुऔषधबाहेक प्रहरीले नगद रकम र मोबाइल फोन पनि बरामद गरेको छ । पक्राउ परेकामध्ये केहीमाथि लागुऔषधसम्बन्धी मुद्दा र चार जनामाथि अभद्र व्यवहारसम्बन्धी मुद्दा चलाइने तयारी गरिएको छ ।
प्रहरीका अनुसार भारतीय नागरिक ३१ वर्षीया श्रृष्टी चन्द र ३५ वर्षीय अनुभव शर्मा, ब्राजिलका ४८ वर्षीय चार्ल्स गुवाइवा लगायतका विदेशी नागरिकसहित नेपाली युवायुवतीहरू विशाल परियार, आशिष दर्जी, बमेन्द्र पुन, सौरभ महरा, निकुञ्ज कार्की, सक्षम कोइराला, रोशन अधिकारी, विवेक परियार र लोकबहादुर घर्तीमगरमाथि पनि मुद्दा चलाइने भएको छ ।
एसपी कार्कीले भने, ‘कम उमेरदेखि पाको उमेरसम्मका मानिसहरू एउटै स्थानमा भेला भएर खुलमखुला लागुऔषध प्रयोग गर्दै रमाइरहेका थिए । यस्तो गतिविधि कानुनविरुद्ध हो र सह्य छैन ।’ प्रहरीका अनुसार उक्त ट्रान्स पार्टी तीन दिनसम्म सञ्चालन गर्ने तयारीसहित आयोजना गरिएको थियो । नेपालमा यस्तो प्रकारको पार्टी अवैध मानिन्छ । यसअघि पनि पोखराकै एक पाँचतारे होटलमा यस्तै कार्यक्रम भएको घटना सार्वजनिक भइसकेको छ ।
प्रतिक्रिया दिनुहोस् !