वीरगंज (पर्सा), १६ चैत । पर्साको कालिकामाई गाउँपालिकामा पछिल्लो समय आफूलाई ‘जेन–जी प्रतिनिधि’ भनेर चिनाउने केही युवाहरुको गतिविधि नियन्त्रणबाहिर जान थालेको भन्दै जनप्रतिनिधि र कर्मचारीहरुले प्रशासनको ध्यानाकर्षण गराएका छन् । उनीहरुले ती व्यक्तिहरूमाथि कानुनी कारबाहीको माग गर्दै जिल्ला प्रशासन कार्यालय पर्सामा औपचारिक उजुरी दर्ता गरेका छन् ।
सोमबार गाउँपालिका अध्यक्ष बशिष्ट कुमार गुप्ता, उपाध्यक्ष राजमती बरैनी सहितको टोलीले प्रमुख जिल्ला अधिकारी भोला दाहाल समक्ष पुगेर लिखित निवेदन बुझाएको हो । टोलीमा विभिन्न वडाध्यक्ष, प्रमुख प्रशासकीय अधिकृत र कर्मचारीहरुको समेत उल्लेख्य उपस्थिति रहेको थियो ।
गाउँपालिकाको दाबी अनुसार करिब तीन महिनादेखि ६–७ जनाको समूहले सार्वजनिक सूचनाको नाममा कार्यालय प्रवेश गर्ने, तर त्यसको आडमा कर्मचारीहरूमाथि अपमानजनक व्यवहार गर्ने, गालीगलौज गर्ने तथा असम्बन्धित र अनावश्यक जानकारी माग्ने जस्ता गतिविधि दोहोर्याउँदै आएका छन् । यति मात्र होइन, केही कर्मचारीलाई धम्की दिने र कुटपिटसम्म गर्ने चेतावनी दिएको आरोप समेत लगाइएको छ ।
यसअघि गाउँपालिकाले सम्बन्धित व्यक्तिहरूसँग संवादमार्फत समस्या समाधान गर्ने प्रयास गरेको जनाएको छ । अध्यक्ष, प्रमुख प्रशासकीय अधिकृत तथा अन्य कर्मचारीमार्फत पटक–पटक जानकारी गराइए पनि स्थिति सुधारिनुको सट्टा झन् जटिल बन्दै गएको बताइएको छ । पछिल्ला दिनमा उनीहरूको गतिविधि अझ आक्रामक बन्दै गएको र दैनिक सेवा प्रवाहमै अवरोध सिर्जना भएको गाउँपालिकाको भनाइ छ ।
उक्त समूहका अगुवा मानिएका राजनिश कुशवाहा विरुद्ध आवश्यक कानुनी प्रक्रिया अघि बढाउन प्रशासनसँग माग गरिएको छ । जनप्रतिनिधिहरूले यस्ता गतिविधिले स्थानीय तहको कामकारबाहीमा गम्भीर असर पारेको भन्दै शीघ्र हस्तक्षेपको अपेक्षा गरेका छन् ।
स्थानीय तहमा देखिएको यस्तो अराजक प्रवृत्तिले प्रशासनिक संयन्त्रको मर्यादा र सेवा प्रवाहको प्रभावकारितामाथि प्रश्न उठाएको छ । यदि यस्ता घटनालाई समयमै नियन्त्रणमा ल्याउन सकिएन भने यसले अन्य निकायहरूमा समेत नकारात्मक सन्देश जाने खतरा रहेको सरोकारवालाहरूले बताएका छन् । 
प्रतिक्रिया दिनुहोस् !