काठमाडौँ, १२ चैत । काठमाडौंको प्रमुख पर्यटकीय केन्द्र ठमेल पछिल्लो समय अवाञ्छित गतिविधिका कारण असुरक्षित बन्दै गएको पाइएको छ । विशेषगरी पर्यटक भिसामा नेपाल आएका विदेशी नागरिकहरू नै गैरकानुनी तथा अनैतिक क्रियाकलापमा संलग्न देखिएपछि सुरक्षा चुनौती थप गहिरिएको छ । राजधानीको ‘हर्ट’ मानिने ठमेल, जहाँ दिनरात पर्यटकको चहलपहल रहन्छ, त्यही क्षेत्रमा रात पर्दै जाँदा फरक खालका गतिविधि मौलाउन थालेका छन् । चम्किलो बत्ती र पर्यटकमैत्री वातावरणको आवरणभित्र लुकेका यस्ता गतिविधिले ठमेलको छवि नै धुमिल बनाउने संकेत देखिएको छ ।
प्रहरी स्रोतका अनुसार राति ११ बजेसँगै सडक सुनसान हुन थालेपछि केही समूह सक्रिय हुने गरेको सूचना प्राप्त भएको थियो । सोही सूचनाको आधारमा जिल्ला प्रहरी परिसर काठमाडौं र प्रहरी वृत्त लैनचौरले संयुक्त रूपमा ‘सप्राइज अपरेशन’ सञ्चालन गरेको थियो । उक्त अपरेशनमा पर्यटक भिसामा नेपाल आएका २० जना युगान्डाली महिलालाई पक्राउ गरिएको छ, जो यौन व्यवसायमा संलग्न रहेको प्रारम्भिक अनुसन्धानबाट खुलेको छ । पक्राउ परेका महिलाहरूको उमेर २४ देखि ४७ वर्षसम्म रहेको छ । उनीहरू सबै तीन महिनाको भिजिट भिसामा नेपाल आएको र आपसमा चिनजान भएको समेत खुलेको छ ।
आर्थिक रूपमा कमजोर पारिवारिक अवस्थाका कारण विदेशिएको उनीहरूले नेपालमा आएपछि विभिन्न होटलमा बस्दै यौन व्यवसाय सञ्चालन गरेको बयान दिएका छन् । अनुसन्धानमा उनीहरू दिनको समयमा निष्क्रिय रहने तर राति मात्र सक्रिय हुने गरेको देखिएको छ । विशेषगरी मादक पदार्थ सेवन गरेका पुरुषहरूलाई लक्षित गर्दै उनीहरूले सडकमै जिस्क्याउने, बार्गेनिङ गर्ने र ग्राहकलाई होटल वा एकान्त स्थानसम्म लैजाने गरेको पाइएको छ । न्यूनतम १५ सय रुपैयाँबाट कारोबार सुरु हुने गरेको समेत खुलेको छ ।
प्रहरीले जनाएको अनुसार यस्ता गतिविधि केवल सडकमा सीमित छैनन् । विभिन्न अनलाइन प्लेटफर्ममार्फत समेत यौन सेवाको प्रचारप्रसार हुने गरेको भेटिएको छ । सामाजिक सञ्जाल र वेबसाइटहरूमा युवतीहरूको फोटो, सम्पर्क विवरण र सेवा सम्बन्धी जानकारी राखी ग्राहकसँग अग्रिम रकम लिएर ‘बुकिङ’ गर्ने संगठित सञ्जाल सक्रिय रहेको संकेत मिलेको छ । हाल जिल्ला प्रशासन कार्यालय काठमाडौंबाट १२ दिनको म्याद थप गरी घटनाबारे विस्तृत अनुसन्धान भइरहेको प्रहरीले जनाएको छ ।
नेपालमा यौन व्यवसाय कानुनी रूपमा प्रतिबन्धित भएपनि ठमेल क्षेत्रमा यसले ‘ओपन सेक्रेट’ जस्तो रूप लिँदै गएको देखिन्छ । भिजिट भिसाको दुरुपयोग गर्दै यस्ता गतिविधि सञ्चालन हुनु अध्यागमन प्रणाली र सुरक्षा संयन्त्रमाथि नै प्रश्न उठाउने विषय बनेको छ । ठमेलको साख जोगाउनु केवल प्रहरीको दायित्व मात्र नभई यहाँका व्यवसायी, होटल सञ्चालक र स्थानीय समुदायको पनि उत्तिकै जिम्मेवारी हो । पर्यटनमा निर्भर अर्थतन्त्रका लागि यस्ता घटनाले दीर्घकालीन नकारात्मक प्रभाव पार्न सक्ने भएकाले सम्बन्धित निकायले कडा निगरानी र प्रभावकारी नियन्त्रण अभियान सञ्चालन गर्नु अत्यावश्यक देखिएको छ ।
प्रतिक्रिया दिनुहोस् !