वीरगंज (पर्सा), ८ फागुन । पर्सा क्षेत्र नं. २ मा प्रतिनिधिसभा सदस्य पदका उम्मेदवार अशोक टेमानीले आफ्नो घरदैलो अभियानलाई थप सशक्त बनाउँदै बिरगंज महानगरपालिका वडा नम्बर २४ ड्राईपोर्ट बहुवरी टोलका मतदाताहरूसँग भेटघाट तथा प्रत्यक्ष संवाद गरेका छन् । जनता समाजवादी पार्टी (जसपा) का तर्फबाट उम्मेदवारी दिएका टेमानीले चुनावी प्रचारप्रसार कार्यक्रम अन्तर्गत स्थानीय बासिन्दासँग भेटघाट गरी उनीहरूको समस्या, सुझाव र अपेक्षाबारे गहिरो रूपमा जानकारी लिएका हुन् ।
ग्रामीण भेगमा पर्ने ड्राईपोर्ट बहुवरी टोलमा पुगेका टेमानीलाई स्थानीयले स्वागत गर्दै आफ्ना दैनिकी भोगाईका कठिनाइहरू खुलेर सुनाएका थिए । विशेषगरी खानेपानीको चरम अभाव, शिक्षा क्षेत्रको कमजोर अवस्था, स्वास्थ्य सेवाको पहुँचमा कमी तथा कृषि क्षेत्रमा देखिएका विभिन्न समस्याहरूबारे स्थानीयले गुनासो गरेका थिए । वर्षौंदेखि समाधानको प्रतीक्षामा रहेका यी समस्याले जनजीवन प्रभावित बनेको उनीहरूको भनाइ थियो ।
खानेपानीको समस्या यहाँका बासिन्दाका लागि प्रमुख चुनौती बनेको स्थानीयहरुको गुनासो थियो । नियमित शुद्ध खानेपानीको व्यवस्था नहुँदा महिलाहरू र बालबालिकाले टाढाटाढाबाट पानी बोकेर ल्याउनुपर्ने अवस्था रहेको स्थानीयको भनाइ छ । कतिपय स्थानमा हातेधारा बिग्रिएको, कतै पाइपलाइन जडान भएपनि पानी नआउने समस्या रहेको स्थानीय मतदाताहरुले गुनासो गरेका र्थि । यसले स्वास्थ्यमा समेत नकारात्मक असर पारेको स्थानीयको अनुभव छ ।
त्यस्तै, शिक्षा क्षेत्र पनि सन्तोषजनक नरहेको बताइएको छ । सरकारी विद्यालयमा शिक्षक अभाव, भौतिक पूर्वाधारको कमी तथा गुणस्तरीय शिक्षाको अभावले विद्यार्थीहरू प्रभावित बनेका छन् । कतिपय अभिभावकले आफ्ना सन्तानलाई राम्रो शिक्षा दिलाउन आर्थिक बोझ व्यहोर्दै निजी विद्यालयमा पठाउनुपर्ने बाध्यता रहेको बताए । ग्रामीण क्षेत्र भएकै कारण शिक्षामा पछाडि परेको महसुस स्थानीयवासीले व्यक्त गरेका छन् ।
स्वास्थ्य सेवाको अवस्था पनि त्यत्तिकै कमजोर रहेको गुनासो गरिएको छ । नजिकै सुविधा सम्पन्न स्वास्थ्य संस्था नहुँदा सामान्य उपचारका लागि समेत वीरगंज बजार क्षेत्र धाउनुपर्ने अवस्था रहेको स्थानीयले बताएका थिए । आकस्मिक बिरामी परेका बेला यातायात र खर्चको अभावले झन् कठिनाइ थपिने गरेको उनीहरूको भनाइ थियो । स्वास्थ्य चौकीमा आवश्यक औषधी र जनशक्तिको अभाव रहेको पनि स्थानीयले जानकारी गराए ।
कृषि क्षेत्रमा पनि पर्याप्त सिंचाइ सुविधा नहुँदा किसानहरू मारमा परेका छन् । मलखाद, बिउबिजन तथा बजार व्यवस्थापनमा समस्या रहेको गुनासो गर्दै किसानहरूले राज्यबाट आवश्यक सहयोग नपाएको बताएका छन् । उत्पादन भएको कृषि उपजले उचित मूल्य नपाउँदा कृषकहरू निराश बनेको पाइएको थियो । ग्रामीण अर्थतन्त्रको मेरुदण्ड मानिने कृषि क्षेत्रलाई सुदृढ बनाउन दीर्घकालीन योजना आवश्यक रहेको उनीहरूको धारणा थियो ।
स्थानीयका गुनासा ध्यानपूर्वक सुनेपछि उम्मेदवार टेमानीले आफू जनताको आवाज संसदसम्म पुर्याउने प्रतिबद्धता व्यक्त गरेका थिए । उनले खानेपानी, शिक्षा, स्वास्थ्य र कृषि जस्ता आधारभूत क्षेत्रलाई प्राथमिकतामा राखेर काम गर्ने अठोट व्यक्त गर्दै दीर्घकालीन र दिगो समाधानका लागि पहल गर्ने बताए । ‘जनताको विश्वास र साथ पाएर संसदमा पुगेपछि यहाँका समस्यालाई योजनाबद्ध ढंगले समाधान गर्न पहल गर्नेछु,’ उनले भने ।
टेमानीले विकासको मूल आधार स्थानीय आवश्यकता र सहभागितामै रहेको उल्लेख गर्दै जनताको सक्रिय सहकार्यबाट मात्र समृद्धि सम्भव हुने धारणा राखे। उनले ग्रामीण क्षेत्रलाई केन्द्रमा राखेर विकास योजना बनाइनुपर्ने आवश्यकता औंल्याए। साथै, युवाहरूलाई रोजगारी सिर्जना गर्ने कार्यक्रम, किसानमैत्री नीति तथा सामाजिक न्यायलाई सुदृढ बनाउने एजेन्डा आफ्नो प्राथमिकतामा रहेको बताए।
घरदैलो अभियानका क्रममा स्थानीय मतदाताले पनि उम्मेदवारसँग प्रत्यक्ष संवाद गर्न पाउँदा खुसी व्यक्त गरेका थिए। उनीहरूले विगतमा नेताहरूले आश्वासन दिए पनि कार्यान्वयन पक्ष कमजोर रहेको भन्दै यसपटक परिणाममुखी कामको अपेक्षा रहेको बताए।
समग्रमा, बिरगंज महानगरपालिका वडा नम्बर २४ डराईपोरट बहुवरीमा सम्पन्न भेटघाट तथा संवाद कार्यक्रमले स्थानीय समस्यालाई उजागर गर्दै चुनावी माहोललाई थप तताएको छ। उम्मेदवार टेमानीले उठाएका प्रतिबद्धता र स्थानीयको अपेक्षाबीचको समन्वय कत्तिको प्रभावकारी रूपमा कार्यान्वयन हुन्छ भन्ने विषय आगामी दिनमा महत्त्वपूर्ण बन्ने देखिन्छ । घरदैलो अभियानलाई तीव्र बनाउँदै उनले पर्सा क्षेत्र नं. २ मा आफ्नो उपस्थितिलाई अझ मजबुत बनाइरहेका छन् ।
प्रतिक्रिया दिनुहोस् !