वीरगंज (पर्सा), ७ फागुन । पर्सा जिल्लाको बिन्दवासिनी गाउँपालिका प्रमुखका आकांक्षी तथा जनता समाजवादी पार्टीका प्रभावशाली युवा नेता मधुसुदन चौरसियाको नेतृत्वमा सयौं नेताकार्यकर्ता नेकपा एमालेमा समाहित भएका छन् । चौरसियासँगै ओकिल मियाँ, नन्दु साह कानु, सोयल अख्तर, प्रभु बैठा लगायतका सक्रिय स्थानीय नेताहरूले पनि एमाले रोजेका छन् ।
काठमाडौंमा आयोजित विशेष कार्यक्रममा नवप्रवेशीहरूलाई एमाले अध्यक्ष तथा पूर्वप्रधानमन्त्री केपी शर्मा ओलीले खादा र टीका लगाएर औपचारिक स्वागत गरेका थिए । कार्यक्रममा बोल्दै अध्यक्ष ओलीले देशलाई समृद्धि, सुशासन र दिगो विकासतर्फ अघि बढाउन एमाले सक्षम र विश्वासिलो राजनीतिक शक्ति भएको दाबी गरे । उनले नवआगन्तुकहरूको सहभागिताले पार्टी संगठन अझ मजबुत हुने विश्वास व्यक्त गरे ।
पार्टी प्रवेश गर्ने नेताहरूले स्थानीय तहदेखि संघीय संरचनासम्म स्थायित्व र विकासका लागि एमाले नेतृत्व अपरिहार्य रहेको धारणा राखेका थिए । उनीहरूले पर्सा निर्वाचन क्षेत्र नम्बर ३ का एमाले उम्मेदवार रुपेश पाण्डेको विजय सुनिश्चित गर्न आफूहरू सक्रिय रूपमा परिचालित हुने प्रतिबद्धता जनाए । ठूलो संख्यामा कार्यकर्ता एमालेमा प्रवेश गरेसँगै पर्सा–३ मा पार्टीको संगठनात्मक शक्ति उल्लेखनीय रूपमा विस्तार भएको दाबी गरिएको छ ।
यस राजनीति घटनाक्रमले पर्सा–३ को चुनावी समीकरणमा नयाँ ऊर्जा थपिएको एमाले नेताहरूको भनाइ छ । नवप्रवेशीहरूको साथले उम्मेदवार पाण्डेको जित थप बलियो आधारमा उभिएको दाबीसमेत गरिएको छ । एमालेका केन्द्रीय सदस्य तथा पर्सा जिल्ला इन्चार्ज प्रभु हजराको सक्रिय पहल र निरन्तर समन्वयका कारण जिल्लामा पार्टी संरचना सुदृढ हुँदै गएको स्रोतले जनाएको छ । संगठन विस्तार र निर्वाचन परिचालनलाई थप प्रभावकारी बनाउन हजरालाई विशेष जिम्मेवारी दिइएको एमालेले जनाएको छ ।
चौरसिया नेतृत्वको यो प्रवेशसँगै पर्सामा दलगत पुनर्संरचना तीव्र बन्दै गएको संकेत देखिएको छ । चुनाव नजिकिँदै गर्दा यस्ता सामूहिक प्रवेशहरूले स्थानीय राजनीतिक सन्तुलनमा उल्लेखनीय प्रभाव पार्ने आँकलन गरिएको छ ।
प्रतिक्रिया दिनुहोस् !