वीरगंज (पर्सा), ७ फागुन । पर्सा निर्वाचन क्षेत्र नम्बर २ की नेकपा (एमाले) उम्मेदवार रिमा कुमारी यादवले आफ्नो चुनावी प्रतिबद्धता पत्र सार्वजनिक गर्दै आगामी निर्वाचनका लागि स्पष्ट कार्ययोजना प्रस्तुत गरेकी छन् । ‘समृद्ध नेपाल, सुखी नेपाली’ को राष्ट्रिय दृष्टिकोणसँगै पर्सा–२ को समग्र विकासमा केन्द्रित योजना अघि सारिएको प्रतिबद्धता पत्रमा उल्लेख छ ।
प्रतिबद्धता पत्रअनुसार यादव संसदमा सक्रिय र सचेत सांसदको भूमिका निर्वाह गर्दै नीति निर्माणमा भाग लिने लक्ष्य राखेकी छन् । उनले कानुन निर्माण प्रक्रियामा मधेसको भू–धरातल, सीमावर्ती क्षेत्रका चुनौती र पर्सावासीका आवश्यकतालाई प्रतिबिम्बित गराउने गरी बहसमा सहभागी हुने प्रतिबद्धता जनाएकी छन् । त्यस्तै, पर्सागढी गुरुयोजना र सिँचाइ योजनाजस्ता महत्वपूर्ण परियोजनाहरूलाई राष्ट्रिय प्राथमिकतामा राख्न बजेट पैरवी गर्ने तयारी समेत उनले उल्लेख गरेकी छन् ।
कृषि क्षेत्रमा किसानमैत्री नीति लागू गर्ने, मल तथा बीउको स्थायी व्यवस्थापन सुनिश्चित गर्ने र कृषि उत्पादनको भण्डारणका लागि चिस्यान केन्द्र निर्माण प्राथमिकतामा राख्ने प्रतिबद्धता पत्रमा समावेश छ । कृषि अनुदान वास्तविक किसानसम्म पुग्ने व्यवस्था, सरल तथा प्रभावकारी कृषि बीमा प्रणाली र किसानहरूको दीर्घकालीन हित सुनिश्चित गर्ने कदमसमेत उल्लेख गरिएको छ ।
स्वास्थ्य र शिक्षामा सुधारका लागि क्षेत्रभित्र विशेषज्ञ स्वास्थ्य सेवा विस्तार, आवश्यक उपकरण र दक्ष जनशक्ति व्यवस्थापनको योजना रहेको छ । महिला स्वास्थ्यको विशेष ध्यान दिँदै पाठेघर क्यान्सर परीक्षण र उपचार निःशुल्क तथा प्रभावकारी बनाउने योजना पनि प्रतिबद्धता पत्रमा समेटिएको छ । विद्यालय शिक्षालाई प्राविधिक र प्रयोगात्मक क्षेत्रमा केन्द्रित गर्दै विषयगत शिक्षक दरबन्दी सुनिश्चित गर्ने प्रतिवद्धता पनि उल्लेख छ ।
सांस्कृतिक र पर्यटकीय विकासतर्फ पर्सागढीको ऐतिहासिक धरोहर प्रवद्र्धन, गुरुयोजना कार्यान्वयन तथा पूर्वाधार विकास मार्फत विन्दवासिनी मन्दिरलगायत धार्मिक स्थलहरूलाई पर्यटन सर्किटमा समेट्ने योजना अघि सारिएको छ । सुशासन र जनउत्तरदायित्व सुनिश्चित गर्न ‘सांसदसँग सवाल’ कार्यक्रम सञ्चालन गरी नियमित जनसंवाद, सार्वजनिक सुनुवाइ र सरकारी सेवामा पारदर्शिता तथा गुणस्तरमा कडा निगरानी गर्ने योजना पनि प्रतिबद्धता पत्रमा समेटिएको छ ।
उम्मेदवार यादवले मतदातालाई आफ्नो विकास, सेवा र रोजगारीमुखी एजेन्डासँग परिचित गराउँदै ‘सूर्य चिन्ह’ मा मतदान गरी उनलाई विजयी बनाउने अपील गरेकी छन् । उनका योजनाले क्षेत्रीय विकास र स्थायी सुधारमा केन्द्रित अभियानको प्रतिविम्ब दिने विश्लेषकहरूले बताएका छन् ।
प्रतिक्रिया दिनुहोस् !