वीरगंज (पर्सा), ७ फागुन । वीरगंज महानगरपालिका–१० (आदर्शनगर क्षेत्र) का दीर्घकालीन शहरी समस्यालाई चुनावी एजेण्डाको केन्द्रमा राख्दै पर्सा निर्वाचन क्षेत्र नं. २ का प्रतिनिधिसभा सदस्य उम्मेदवार अशोक टेमानीले समाधानमुखी प्रतिबद्धता व्यक्त गरेका छन् । चुनावी प्रचारप्रसारलाई तीव्र बनाउने क्रममा टेमानीले वडा नं. १० मा घरदैलो कार्यक्रम सञ्चालन गरी मतदाता भेटघाट तथा प्रत्यक्ष संवाद गरेका हुन् । कार्यक्रमका दौरान उनले स्थानीय बासिन्दासँग सडक, ढल निकास, फोहोर व्यवस्थापन, ट्राफिक जाम, खानेपानी आपूर्ति तथा शहरी सुरक्षासम्बन्धी गुनासाहरू प्रत्यक्ष सुनेका थिए ।
स्थानीयवासीले वर्षायाममा सडक जलमग्न हुने, नाला अवरुद्ध हुँदा दुर्गन्ध फैलिने, अव्यवस्थित पार्किङका कारण दैनिक जामको समस्या झेल्नुपरेको गुनासो गरेका थिए । त्यस्तै, कतिपय गल्लीमा सडक बत्ती अभाव र पुराना खानेपानी पाइपलाइनका कारण पानीको गुणस्तरमा समस्या रहेको बताएका थिए । उम्मेदवार टेमानीले यस्ता समस्या अस्थायी योजनाले समाधान नहुने उल्लेख गर्दै दीर्घकालीन पूर्वाधार विकास योजनाको आवश्यकता औंल्याए । उनले संघीय संसद्मा निर्वाचित भएपछि वीरगंजका मुख्य शहरी समस्यालाई प्राथमिकतामा राखी सम्बन्धित मन्त्रालय र निकायसँग समन्वय गरी स्थायी समाधानका लागि पहल गर्ने प्रतिबद्धता जनाए ।
टेमानीले शहरी व्यवस्थापनमा पारदर्शिता, जवाफदेहिता र प्रभावकारी अनुगमन आवश्यक रहेको बताउँदै संघीय तहबाट बजेट विनियोजन र योजनाको कार्यान्वयनमा आफू सक्रिय भूमिका खेल्ने बताए । ‘वडा नं. १० का समस्या केवल स्थानीय होइनन्, यो समग्र पर्सा–२ को शहरी चुनौती हो,’ उनले भने, ‘दीर्घकालीन दृष्टिकोणसहित योजना बनाएर मात्र स्थायी समाधान सम्भव छ ।’ घरदैलो कार्यक्रममा सहभागी मतदाताले विकासको आश्वासनभन्दा कार्यान्वयनमा जोड दिन आग्रह गरेका थिए । त्यसप्रति प्रतिक्रिया दिँदै टेमानीले निर्वाचनपछि नियमित जनसम्पर्क, सार्वजनिक सुनुवाइ र प्रगति प्रतिवेदनमार्फत नागरिकलाई जानकारी गराउने प्रणाली विकास गर्ने आश्वासन दिए ।
चुनावी अभियानलाई थप सशक्त बनाउँदै उनले वडा नं. १० का मतदातासँग अमूल्य मत प्रदान गरी विजयी बनाउन आग्रहसमेत गरेका छन् । ‘तपाईंहरूको विश्वास र समर्थनले मात्र परिवर्तन सम्भव छ,’ भन्दै उनले मतदातालाई आफ्नो पक्षमा उभिन आह्वान गरे । निर्वाचन नजिकिँदै जाँदा पर्सा क्षेत्र नं. २ मा चुनावी प्रतिस्पर्धा तीव्र बन्दै गएको छ । यस्तो अवस्थामा वडा नं. १० जस्ता घनाबस्ती क्षेत्रमा केन्द्रित अभियान र स्पष्ट एजेण्डासहितको प्रतिबद्धताले टेमानीको उम्मेदवारीलाई थप मजबुत आधार दिएको विश्लेषण भइरहेको छ । स्थानीय मुद्दालाई राष्ट्रिय मञ्चमा उठाउने अठोटसहित अघि बढेको उनको अभियानले पर्सा–२ को चुनावी समीकरणमा महत्वपूर्ण प्रभाव पार्ने संकेत देखिएको छ ।
प्रतिक्रिया दिनुहोस् !