वीरगंज (पर्सा), ५ फागुन । सशस्त्र प्रहरी बल नेपाल पर्सा र नेपाल प्रहरीको संयुक्त टोलीले पर्साको पकहाँमैनपुर गाउँपालिकाबाट कार चालकसहित १६० किलो गाँजा बरामद गरेको छ ।
संयुक्त टोलीले पर्साको पकहाँमैनपुर गाउँपालिकाको मधुवनीचोकतर्फ आइरहेको प्रदेश ३–०१–००२ च ५४३२ नम्बरको सुजुकी स्वीफ्ट कार रोकेर जाँच गर्दा चालक बुद्धिलाल घलानसहित उक्त परिमाणको गाँजा बरामद गरेको हो । गाँजा प्याकिङ गरेको अवस्थामा कारको डिक्कीबाट फ्याँक्ने क्रममा चालक पक्राउ परेका थिए ।
सशस्त्र प्रहरी बल नेपाल नम्बर १३ गण हेडक्वार्टर गणपति तथा सशस्त्र प्रहरी उपरीक्षक मोहनबहादुर क्षेत्रीले चालक घलानलाई आवश्यक कारबाहीका लागि इलाका प्रहरी कार्यालय पोखरिया पठाइएको जानकारी दिए । सशस्त्र प्रहरीका अनुसार पक्राउ परेका घलानको साथबाट २२ हजार ५०० रुपैयाँ नगद र मोबाइल पनि बरामद भएको छ ।
उक्त गाँजा भारततर्फ लैजान लागिएको प्रारम्भिक अनुसन्धानबाट खुलेको छ ।
प्रतिक्रिया दिनुहोस् !