वीरगंज (पर्सा), ४ फागुन । पर्सा निर्वाचन क्षेत्र नम्बर ३ बाट नेपाल कम्युनिष्ट पार्टी (एमाले)का उम्मेदवार रुपेश कुमार पाण्डेले आफू चर्चाका लागि नभई ठोस उपलब्धि हासिल गर्ने उद्देश्यले राजनीतिमा सक्रिय भएको बताएका छन् । मतदाता भेटघाट तथा अन्तरक्रिया कार्यक्रममा बोल्दै उनले लोकप्रिय नाराभन्दा परिणाम दिने कामलाई प्राथमिकता दिने स्पष्ट पारे ।
आफ्नो धारणा सार्वजनिक गर्दै पाण्डेले विकास, सुशासन र संरचनागत सुधारलाई मुख्य कार्यदिशा बनाउने प्रतिबद्धता जनाए । विशेषगरी कृषि क्षेत्रको रूपान्तरणलाई पहिलो प्राथमिकतामा राखेको उल्लेख गर्दै उनले साना तथा मध्यम किसानका उत्पादनको उचित मूल्य सुनिश्चित गर्ने, मलखाद र सिँचाइको नियमित तथा सहज व्यवस्था मिलाउने र कृषि उपजको वैज्ञानिक बजार प्रणाली विकास गर्ने योजना अघि सारे । उनका अनुसार कृषिलाई निर्वाहमुखी अवस्थाबाट बाहिर निकालेर व्यावसायिक र प्रतिस्पर्धी बनाउने नीति–आधारित पहल अपरिहार्य छ ।
शिक्षा र स्वास्थ्य क्षेत्रलाई दीर्घकालीन मानव विकासको आधारका रूपमा प्रस्तुत गर्दै उनले शिक्षामा प्रविधिमैत्री र सीपकेन्द्रित कार्यक्रम विस्तार गरी गुणस्तर सुधार गर्ने तथा स्वास्थ्य संस्थाहरूको स्तरोन्नति गर्दै आधारभूतदेखि विशेषज्ञ सेवासम्मको पहुँच विस्तार गरिने बताए । युवालाई स्वदेशमै सम्मानजनक रोजगारी र उद्यमशीलताको अवसर उपलब्ध गराउने, महिलालाई नेतृत्व विकास र निर्णय प्रक्रियामा प्रभावकारी सहभागिता सुनिश्चित गर्ने तथा ज्येष्ठ नागरिकका लागि समुदाय आधारित सहयोग प्रणाली मजबुत बनाउने विषय पनि आफ्नो प्राथमिक एजेन्डामा रहेको उनले स्पष्ट गरे ।
निर्वाचित भए नियमित रूपमा जनप्रतिवेदन सार्वजनिक गर्दै पारदर्शिता र प्रत्यक्ष जवाफदेहिता कायम गर्ने प्रतिबद्धता दोहोर्याउँदै पाण्डेले भने, “मेरो राजनीति नारा र प्रचारमा सीमित हुँदैन। दिगो संरचना निर्माण गर्दै भविष्यको भरोसा जित्नु नै मेरो उद्देश्य हो । सेवा नै राजनीति हो भन्ने मान्यतालाई व्यवहारमै उतारेर देखाउनेछु ।”
प्रतिक्रिया दिनुहोस् !