वीरगंज (पर्सा), २ फागुन । नेकपा एमाले पर्सा क्षेत्र नम्बर–३ मा आयोजित विशेष पुनर्मिलन कार्यक्रमले चुनावी माहोललाई थप उत्साहपूर्ण बनाएको छ । पर्सा क्षेत्र नं. ३ (ख) का निर्वतमान प्रदेश सांसद तथा एमालेका पुराना नेता प्रहल्लाद गिरी र युवा नेता रमेश साह पुनः पार्टीमा आवद्ध भएका छन् ।
कार्यक्रममा उनीहरूलाई पर्सा–३ का प्रतिनिधिसभा सदस्य उम्मेदवार रुपेश कुमार पाण्डे, पूर्व प्रदेश मन्त्री प्रमोद जयसवाल सहित स्थानीय अगुवा र कार्यकर्ताहरूले औपचारिक रूपमा स्वागत गरेका थिए । उपस्थित नेताकार्यकर्ताले ‘आफ्नै घरमा पुनः आगमन’ भएको भन्दै खुसी व्यक्त गरेका थिए ।
सम्बोधनका क्रममा नेताहरूले देशको राष्ट्रियता सुदृढ गर्न र राजनीतिक स्थायित्व कायम राख्न एमाले बलियो हुनु आवश्यक रहेको धारणा राखे । उनीहरूले आगामी निर्वाचनमा सूर्य चुनाव चिह्नमा मतदान गरी स्थिर सरकार निर्माणमा योगदान दिन मतदातासँग अपिल गरे ।
पुनः पार्टीमा फर्किएका प्रहल्लाद गिरीले प्रतिनिधिसभा उम्मेदवार रुपेश कुमार पाण्डेलाई आफ्नो पूर्ण समर्थन रहेको स्पष्ट पारे । उनले क्षेत्रको विकास र संगठन सुदृढीकरणका लागि सक्रिय भूमिका खेल्ने प्रतिबद्धता व्यक्त गरे । युवा नेता रमेश साहले पनि पार्टीलाई मजबुत बनाउन युवाशक्तिलाई एकताबद्ध गर्ने प्रतिवद्धता जनाए ।
पुनर्मिलन कार्यक्रममा पोखरिया नगरपालिकाका मेयर प्रधुमन प्रसाद चौहान, एमाले पर्साका उपाध्यक्ष मनोज गुप्ता, क्षेत्रीय अध्यक्ष फरमान मियाँलगायत नेताहरूको उल्लेख्य उपस्थिति रहेको थियो । यस पुनर्मिलनसँगै पर्सा क्षेत्र नम्बर–३ मा एमालेको संगठनात्मक आधार थप सशक्त हुने विश्वास पार्टी नेतृत्वले व्यक्त गरेको छ ।
प्रतिक्रिया दिनुहोस् !