वीरगंज (पर्सा), २ फागुन । पर्सा निर्वाचन क्षेत्र नम्बर–२ अन्तर्गत वीरगंज महानगरपालिका–१७ अलौमा शनिबार सम्पन्न घरदैलो कार्यक्रम सामान्य चुनावी अभियानभन्दा फरक देखियो । उम्मेदवार रिमा कुमारी यादव टोल–टोलमा पुग्दा कार्यक्रम आत्मीय भेटघाट र भरोसाको उत्सवजस्तै बनेको थियो ।
स्थानीय आमा दिदीबहिनी तथा ज्येष्ठ नागरिकहरूले यादवलाई ‘लक्ष्मीको स्वरूप’ भन्दै खुलेर समर्थन जनाए । उनलाई फूलमाला र अबिरले स्वागत गरिनुका साथै विजयको कामना गर्दै दही मिठाई (सगुन) खुवाएर सम्मान व्यक्त गरियो । घरआँगनमै भएको यस्तो आत्मीय स्वागतले चुनावी माहोल थप उत्साहित बनेको सहभागीहरूले बताए ।
यादवले औपचारिक भाषणभन्दा प्रत्यक्ष संवादलाई प्राथमिकता दिइन् । उनले स्थानीय बासिन्दाका समस्या, गुनासा र सुझाव ध्यानपूर्वक सुन्दै आफू काममुखी राजनीतिमा विश्वास गर्ने बताइन् । ‘म शब्दभन्दा परिणाममा विश्वास गर्छु । यहाँबाट पाएको विश्वास नै मेरो ऊर्जा हो,’ उनले भनिन् ।
उनले महिलाको आवाजलाई नीति निर्माण तहसम्म पुर्याउने प्रतिबद्धता दोहोर्याउँदै शिक्षा, स्वास्थ्य, सडक पूर्वाधार र रोजगारी सिर्जनामा ठोस पहल गर्ने योजना प्रस्तुत गरिन् । साथै फागुन २१ गते ‘सूर्य’ चुनाव चिन्हमा मतदान गर्न मतदातालाई आग्रह गरिन्, ताकि विकासको निरन्तरता र प्रभावकारी प्रतिनिधित्व सुनिश्चित गर्न सकियोस् ।
कार्यक्रममा नेकपा एमालेका केन्द्रीय सदस्य विजय सरावगी, समानुपातिक उम्मेदवार बिचारी यादव, वडा नम्बर–१७ का वडा अध्यक्ष संजु छत्कुली तथा युवा नेताहरू मुकेश द्विवेदी, अजय साह, पिन्टु उपाध्याय, अमल यादव, प्रधुमन यादव र विकी सिंहसहित समर्थकहरूको उल्लेख्य उपस्थिति थियो ।
अलौमा देखिएको आत्मीय स्वागत र उत्साहपूर्ण सहभागिताले पर्सा–२ मा चुनावी प्रतिस्पर्धा थप रोचक बनेको संकेत दिएको नेताहरूले बताएका छन् ।
प्रतिक्रिया दिनुहोस् !