वीरगंज (पर्सा), २ फागुन । पर्सा क्षेत्र नम्बर–१ मा चुनावी माहोल तातिँदै जाँदा जनमत पार्टीका उम्मेदवार ओमप्रकाश सर्राफले वीरगंज महानगरपालिका वडा नम्बर–१४ पिप्रामा व्यापक घरदैलो, भेटघाट तथा संवाद कार्यक्रम सम्पन्न गरेका छन् । स्थानीय बासिन्दासँग प्रत्यक्ष भेटेर सुझाव लिने र आफ्ना एजेन्डा प्रस्तुत गर्ने उद्देश्यले आयोजित कार्यक्रममा उत्साहजनक सहभागिता देखिएको जनाइएको छ ।
घरदैलोका क्रममा उम्मेदवार सरार्फले तराई मधेशको मुख्य आयस्रोत कृषि भएको उल्लेख गर्दै राज्यले वर्षौंदेखि किसानमाथि विभेद गर्दै आएको आरोप लगाए । उनले किसानलाई सम्मान र अधिकार सुनिश्चित गर्न जनमत पार्टी सधैं प्रतिबद्ध रहेको दाबी गरे । ‘कृषि क्षेत्रलाई आधुनिकीकरण र व्यवसायीकरण नगरेसम्म समृद्ध मधेश सम्भव छैन,’ उनले भने, ‘उत्पादन वृद्धि, उचित बजार र प्रविधिमा पहुँच विस्तार गरेर मात्र किसानको आम्दानी बढाउन सकिन्छ, र त्यो स्पष्ट योजना जनमत पार्टीसँग छ ।’
सरार्फले वीरगंजस्थित कृषि औजार कारखानालाई पूर्ण क्षमतामा सञ्चालनमा ल्याउन आफू दृढ रहेको पनि बताए । सो कारखाना सञ्चालनमा आए किसानलाई सुलभ दरमा आधुनिक उपकरण उपलब्ध हुने र स्थानीय रोजगारी सिर्जना हुने उनको भनाई थियो ।
देश र मधेशको दीर्घकालीन निकासका लागि जनमत पार्टी र डा. सिके राउतसँग स्पष्ट र उत्कृष्ट दृष्टिकोण रहेको जिकिर गर्दै उनले मतदातालाई ‘हर्न’ चुनाव चिन्हमा मतदान गर्न अपिल गरे । ‘विकासको नयाँ अध्याय सुरु गर्न सही नेतृत्व चयन आवश्यक छ,’ उनले जोड दिए ।
कार्यक्रममा पार्टीका नेताहरू विद्याला प्रसाद, रम्भा मिश्रा, समानुपातिक उम्मेदवार विजय पासवान, डा. मनोज कुमार, सीए देवराज, श्याम शंकर चौरसिया, अनिता रौनियार, सिकेन्द्र पटेल, रोहित पटेल, सत्युग साह, तुल्सिराम, सहनवाज राकी, अजित सिंह, मन्जय शर्मा, सुमित सिंह, रामबहादुर पासवान लगायतको उल्लेख्य उपस्थिति रहेको थियो ।
स्थानीय मतदातासँग प्रत्यक्ष संवाद गर्दै जनमत पार्टीले कृषक मैत्री नीति, रोजगारी सृजना र क्षेत्रीय समृद्धिलाई चुनावी एजेन्डाको केन्द्रमा राखेको सन्देश दिएको छ । पिप्रामा सम्पन्न यस कार्यक्रमले पर्सा–१ मा जनमतको चुनावी अभियानलाई थप गति दिएको नेताहरूले बताएका छन् ।
प्रतिक्रिया दिनुहोस् !