वीरगंज (पर्सा), २ फागुन । वीरगंज महानगरपालिका वडा नं. ३० मा जनता समाजवादी पार्टी (जसपा) का स्थानीय नेता मनोज साह कानुसहित करिब एक सय जना नेता तथा कार्यकर्ताले पार्टी परिवर्तन गर्दै नेकपा एमाले रोजेका छन् । वडा नं. ३० मा आयोजित वडा भेला तथा पार्टी प्रवेश कार्यक्रममा उनीहरूले औपचारिक रूपमा जसपा परित्याग गरी एमालेमा आबद्धता जनाएका हुन् ।
नवप्रवेशीहरूलाई नेकपा एमाले पर्सा निर्वाचन क्षेत्र नं. १ का प्रतिनिधिसभा सदस्य उम्मेदवार प्रदीप यादव तथा पार्टीका केन्द्रीय र जिल्ला तहका नेताहरूले फुलमाला र अविर लगाएर स्वागत गरेका थिए । कार्यक्रममा उत्साहजनक सहभागिता रहेको जनाइएको छ ।
पार्टी प्रवेशपछि बोल्दै नवआबद्ध नेताहरूले पर्साको समग्र विकास र समृद्धिका लागि सक्षम र दृढ नेतृत्व आवश्यक रहेको धारणा व्यक्त गरे । उनीहरूले प्रदीप यादवको नेतृत्वमा जिल्लाको विकासले गति लिने विश्वासका साथ एमालेमा प्रवेश गरेको बताए । साथै, आगामी दिनमा संगठन विस्तार गर्दै जनताको हकहितका पक्षमा सक्रिय भूमिका निर्वाह गर्ने प्रतिबद्धता जनाए ।
स्थानीय नेताहरूका अनुसार मनोज साह कानुको आगमनसँगै वडा नं. ३० मा एमालेको संगठनात्मक संरचना थप मजबुत बनेको छ । यस प्रवेशले आगामी निर्वाचनमा पार्टीको स्थिति अझ सुदृढ हुने दाबीसमेत गरिएको छ । कार्यक्रममा नेकपा एमालेका केन्द्रीय सदस्य उर्मिला देवकोटा, विजय सरावगी, पर्सा जिल्ला सचिव महेश दास, मानदेव हजरा, सुन्दर कुर्मी लगायतका नेताहरूको उपस्थिति रहेको थियो ।
समारोहलाई सम्बोधन गर्दै उम्मेदवार प्रदीप यादवले आफू सधैं जनताको सुख दुःखमा साथ दिँदै आएको उल्लेख गरे । विकास र समृद्धिको एजेन्डामा कुनै सम्झौता नगर्ने बताउँदै उनले चुनावी समयमा मात्र सक्रिय हुने प्रवृत्ति अन्त्य हुनुपर्नेमा जोड दिए । साथै उनले मतदातालाई नेकपा एमालेको ‘सूर्य’ चुनाव चिह्नमा मतदान गरी समृद्ध पर्सा निर्माणको अभियानमा साथ दिन आग्रह गरे ।
प्रतिक्रिया दिनुहोस् !