मधेशमा बालेनको क्रेज : घण्टी अभिवादन अभियान, वीरगंजमा बालेनको समर्थनमा उर्लियो जनलहर !

वीरगंज (पर्सा), २८ माघ । राष्ट्रिय स्वतन्त्र पार्टी (रास्वपा) का वरिष्ठ नेता बालेन्द्र शाह ‘बालेन’को स्वागत र सम्मानका लागि बुधबार वीरगंजमा अभूतपूर्व भीड देखिएको छ । रास्वपाले सञ्चालन गरेको जनसम्पर्क तथा ‘घण्टी अभिवादन’ अभियान अन्तर्गत बालेन बुधबार दिउँसो वीरगंज आइपुग्दा नगरका सडक र चोकहरू समर्थक, शुभेच्छुक र सर्वसाधारणले भरिभराउ बनेका थिए । बालेनप्रतिको उत्साहले वीरगंजमा मानौं मानवसागर नै ओर्लिएको दृश्य देखिएको थियो ।

मधेश प्रदेश केन्द्रित अभियानको भागस्वरूप बालेनको यात्रा बिहान ८ बजे सिरहाको लालबन्दीबाट सुरु भएको थियो । त्यसपछि सर्लाहीका हरिवन, बरथवा, गरुडा हुँदै रौतहटको चन्द्रनिगाहपुर पुगेका उनी बाराको निजगढ पुगेपछि पुनः रौतहटको गौर हुँदै कलैया तर्फ फर्किएका थिए । निर्धारित रुटका अधिकांश स्थानमा बिहानैदेखि ठूलो संख्यामा स्थानीय बासिन्दा सडकछेउ उभिएर बालेनको स्वागतमा जुटेका थिए ।

बाराको कलैयाबाट वीरगंजतर्फ आएको टोली प्रतीमा चोक, नयाँ बसपार्क हुँदै वीरगंज महानगर प्रवेश गरेको थियो । त्यहाँबाट रेल्वे रोड, छपकैया, आदर्शनगर, माइस्थान हुँदै घण्टाघर चोकसम्म पुग्दा बाटोभरि जनलहर देखिन्थ्यो । सडक, गल्ली र चोकहरूमा उर्लिएको भीडका कारण केही समय ट्राफिक व्यवस्थापन चुनौतीपूर्ण बनेको थियो । जिल्ला प्रहरी कार्यालय पर्साले कार्यक्रमलाई मध्यनजर गर्दै उच्च सतर्कता अपनाएको जनाएको थियो ।

वीरगंजका विभिन्न स्थानमा पुगेका बालेनलाई स्वागत गर्न पर्साका ग्रामीण भेगबाट समेत पार्टी कार्यकर्ता र सर्वसाधारण नागरिक आएका थिए । ‘अबकी बार बालेन सरकार’, ‘चुपचाप घण्टी छाप’ जस्ता नाराले वातावरण गुन्जायमान बनेको थियो । हात हल्लाउँदै अभिवादन स्वीकार गर्दै अघि बढेका बालेनसँग स्थानीय मतदाता र नागरिकले छोटो संवाद पनि गरेका थिए । रास्वपाको अभियान समितिका अनुसार यो यात्रा जनसम्पर्क सुदृढ बनाउने उद्देश्यले तय गरिएको हो ।

बालेनको रोड शोले वीरगंजमा विशेष उत्साह थपेको देखिन्थ्यो । घरका छत, पसलका आँगन र सडक किनारमा उभिएका मानिसहरूले मोबाइलमा दृश्य कैद गर्दै स्वागत गरेका थिए । कतिपय स्थानमा स्थानीय युवाले फूलमाला र नारासहित टोलीलाई अभिवादन गरेका थिए । भीडको व्यवस्थापनका लागि स्वयंसेवकहरू पनि सक्रिय देखिएका थिए । कार्यक्रम सकिएपछि बालेनसहितको अभियान टोली बाराको जितपुरतर्फ प्रस्थान गरेको र समय मिलेमा पर्साको ठोरीसम्म पुग्ने कार्यतालिका रहेको रास्वपाले जनाएको छ ।

मधेश प्रदेशका विभिन्न सहर र बजार हुँदै अघि बढेको यो यात्रा वीरगंज आइपुग्दा उल्लेखनीय जनउपस्थिति र उत्साहका कारण विशेष चर्चा बटुलेको छ । बालेन शाहप्रतिको आकर्षण र समर्थनले वीरगंजमा बुधबार असाधारण माहोल सिर्जना गर्‍यो । सडकदेखि चोकसम्म देखिएको जनलहरले यो अभियानप्रति स्थानीय जनताको चासो र सहभागिता स्पष्ट झल्काएको छ ।