वीरगंज (पर्सा), २० माघ । नेकपा एमालेका केन्द्रीय उपाध्यक्ष रामबहादुर थापा ‘बादल’ले फागुन २१ गते हुने निर्वाचनलाई सामान्य प्रतिस्पर्धा नभई लोकतन्त्रको पक्ष र विपक्षबीचको निर्णायक संघर्षका रूपमा व्याख्या गर्दै एमालेले जसरी पनि जित हासिल गर्नुपर्ने बताएका छन् । वीरगंज नगर सभागृहमा आयोजित एमाले पर्साको जिल्ला स्तरीय बृहत् कार्यकर्ता भेलालाई सम्बोधन गर्दै प्रमुख अतिथि बादलले राष्ट्रिय स्वतन्त्रता, स्वाभिमान र लोकतन्त्र अपहरणमा परेको दाबी गर्दै त्यसको पुनःस्थापनाका लागि एमालेको विजय अनिवार्य रहेको बताए ।
थापा एमाले केन्द्रीय चुनाव प्रचार–प्रसार समितिका संयोजक समेत हुन् । उनले विगतका निर्वाचनहरू लोकतन्त्रवादी शक्तिहरूबीचको प्रतिस्पर्धा जस्तै देखिएपनि अहिलेको अवस्था फरक रहेको बताए । उनका अनुसार अबको चुनाव लोकतन्त्रको संरक्षण र पुनर्स्थापनासँग प्रत्यक्ष जोडिएको छ । त्यसैले कार्यकर्ताहरूलाई एकताबद्ध भई चुनावी अभियानमा जुट्न उनले आह्वान गरे ।
एमाले पर्साका अध्यक्ष डा. विश्वाम्भर शर्माको अध्यक्षतामा सम्पन्न कार्यक्रममा पार्टीका केन्द्रीय सदस्य तथा पर्सा जिल्ला इन्चार्ज प्रभु हजरा, पर्सा क्षेत्र नम्बर-१ का उम्मेदवार प्रदीप यादव, क्षेत्र नम्बर-२ की उम्मेदवार रिमा कुमारी यादव, क्षेत्र नम्बर-३ का उम्मेदवार रुपेश पाण्डे, क्षेत्र नम्बर-४ का उम्मेदवार जालिम मिया, केन्द्रीय सदस्य निर्मला देवकोटा, विजय सरावागी, मधेश प्रदेश अध्यक्ष चन्द्रेश्वर मण्डल, उपाध्यक्ष विचारी यादव लगायतले आ-आफ्ना धारणा राखेका थिए ।
यसैबीच, वीरगंज महानगरपालिकाका मेयर राजेशमान सिंह र बहादुरमाई नगरपालिकाका मेयर सिंहासन साह तेली मंगलबारदेखि औपचारिक रूपमा एमालेमा प्रवेश गरेका छन् । उनीहरू आफ्ना समर्थक नेता कार्यकर्ताको ठूलो समूहसहित भेलामा सहभागी भई एमालेमा आबद्ध भएका हुन् । नवप्रवेशीहरूलाई उपाध्यक्ष थापाले पार्टीमा स्वागत तथा सम्मान गरेका थिए ।
यी दुवै मेयर एमाले पर्सा क्षेत्र नम्बर-१ का प्रतिनिधिसभा सदस्य उम्मेदवार प्रदीप यादव निकट मानिन्छन् । उनीहरू यसअघि देखि नै यादवको चुनावी अभियानमा सक्रिय रहेको बताइएको छ । यसअघि जनता समाजवादी पार्टी नेपाल फुटेर जनता समाजवादी पार्टी गठन हुँदा समेत मेयरद्वयले यादवलाई साथ दिएका थिए । समाचार स्रोतका अनुसार आगामी स्थानीय तह निर्वाचनमा उनीहरूलाई पालिकाबाट टिकट दिने आश्वासन समेत प्राप्त भएको जनाइएको छ । उल्लेखनीय रूपमा, पूर्वमन्त्री प्रदीप यादवले यही माघ ५ गते जसपा परित्याग गरी एमालेमा प्रवेश गरेका थिए, जसको प्रभाव स्थानीय राजनीतिक समीकरणमा देखिन थालेको छ ।
कार्यक्रममा वक्ताहरूले एमाले संगठन सुदृढीकरण, जनसम्पर्क विस्तार र निर्वाचनमा विजय सुनिश्चित गर्न कार्यकर्तालाई सक्रिय भूमिका निर्वाह गर्न आग्रह गरेका थिए । भेलाले पर्सा जिल्लामा एमालेको चुनावी तयारीलाई थप सुदृढ बनाएको नेताहरूको दाबी छ ।
जनताको सुख दुःखमा साथ दिनेलाई मत दिन यादवको आग्रह
पर्सा क्षेत्र नम्बर-१ का नेकपा एमाले उम्मेदवार तथा पूर्वमन्त्री प्रदीप यादवले मतदातालाई जनताको सुखदुःखमा निरन्तर साथ दिने नेतृत्वलाई मात्र मत दिन आग्रह गरेका छन् । मंगलबार वीरगंजमा आयोजित एमाले शुभेच्छुक पर्सा जिल्ला स्तरीय बृहत् कार्यकर्ता भेलालाई सम्बोधन गर्दै उनले चुनावका बेला मात्रै देखिने र सामान्य अवस्थामा जनताबाट टाढा रहने नेताहरू पुनः मैदानमा उत्रिएको टिप्पणी गरे । 
यादवका अनुसार यस्ता प्रवृत्तिबाट मतदाता सचेत रहन आवश्यक छ । ‘जनताको हरेक आपत–विपत, सुख–दुःखमा सधैं उपस्थित रहने उम्मेदवारलाई भोट दिएर जिताउनुस्,’ उनले आह्वान गरे । उनले यसपटक पर्साका चारै निर्वाचन क्षेत्रमा जनसेवामा सक्रिय उम्मेदवारहरूलाई एमालेले अघि सारेको दाबी गर्दै चारै क्षेत्रमा उल्लेखनीय बहुमतका साथ विजय हासिल हुने विश्वास व्यक्त गरे ।
खानेपानी मन्त्री रहँदा पर्साका विभिन्न पालिकामा पानीको चरम अभाव भएको समयमा आफू प्रत्यक्ष रूपमा घर–घर पुगेर सेवा गरेको अनुभव उनले स्मरण गराए । त्यस समयमा अहिले उम्मेदवार बनेका धेरै नेता जनताको दैलोमा नदेखिएको उनको दाबी थियो ।
‘वीरगंजसहित पर्साका पालिकामा पानीको हाहाकार हुँदा म मन्त्रीको हैसियतमा जनताको घरमै पुगेँ र पानी खुवाएँ,’ उनले भने, ‘त्यसैले फागुन २१ गतेको मतदानमा जनताले दुःख र संकटमा साथ दिने नेतालाई नै रोज्नुहुनेछ भन्नेमा म विश्वस्त छु ।’ यादवले आगामी निर्वाचनमा एमालेको विजयले संविधानको रक्षा र देशको स्थायित्व सुदृढ हुने दाबीसमेत गरे ।
चारै क्षेत्रमा नेकपा एमालेको जीत सुनिश्चित : पाण्डे
नेकपा एमाले पर्सा क्षेत्र नम्बर-३ का उम्मेदवार रुपेश पाण्डेले पर्सा जिल्लाका चारै निर्वाचन क्षेत्रमा एमालेको विजय सुनिश्चित हुने दाबी गरेका छन् । मंगलबार आयोजित एमाले पर्साको जिल्लास्तरीय कार्यकर्ता भेलालाई सम्बोधन गर्दै उनले नेता कार्यकर्ताहरू एकजुट भएर खटिए सहज रूपमा चारै क्षेत्रमा जीत निकाल्न सकिने बताए ।
पाण्डेले वर्तमान राजनीतिक परिस्थितिमा एमालेमाथि विभिन्न दिशाबाट आक्रमण भइरहेको उल्लेख गर्दै पार्टीभित्र रहेका कमजोरी, असमझदारी र मनमुटाव त्यागेर साझा लक्ष्यका साथ अघि बढ्न आग्रह गरे । उनले फागुन २१ गते हुने निर्वाचनलाई लक्षित गर्दै जिल्लाभरका नेता–कार्यकर्ताले सक्रियता बढाउनुपर्नेमा जोड दिए ।
उनका अनुसार विगतका कारणले निष्क्रिय बनेका नेता तथा कार्यकर्ताहरू पनि पुनः पार्टीमा फर्किएर सक्रिय भूमिकामा आउन आवश्यक छ । ‘एमाले सुदृढ बनाउन सबैको योगदान अपरिहार्य छ,’ उनले भने । एमाले पर्साका अध्यक्ष विश्वाम्भर शर्माको अध्यक्षता तथा पार्टीका उपाध्यक्ष रामबहादुर थापा ‘बादल’को प्रमुख आतिथ्यतामा सम्पन्न कार्यक्रममा पर्सा क्षेत्र नम्बर-१ का उम्मेदवार प्रदीप यादव, क्षेत्र नम्बर-२ की उम्मेदवार रिमा कुमारी यादव, क्षेत्र नम्बर-४ का उम्मेदवार जालिम मियाँसहित जिल्लाका विभिन्न तहका नेता कार्यकर्ताहरूको उल्लेख्य उपस्थिति रहेको थियो ।
प्रतिक्रिया दिनुहोस् !