वीरगंज (पर्सा), १६ माघ । वीरगंजको पानीटंकी क्षेत्रमा अवस्थित लिटल बडी प्रि–स्कुलले शुक्रबार आफ्नो तेस्रो वार्षिकोत्सव भव्य रूपमा सम्पन्न गरेको छ । क्लासिक बंक्वेटमा आयोजित कार्यक्रमको औपचारिक उद्घाटन वीरगंज महानगरपालिकाका प्रमुख प्रशासकीय अधिकृत अरविन्दलाल कर्णले गरेका थिए ।
उद्घाटनपछि शुभकामना मन्तव्य व्यक्त गर्दै प्रमुख अतिथि कर्णले भने, ‘बालबालिकालाई केवल पाठ्यपुस्तकमा आधारित अध्ययनभन्दा व्यावहारिक ज्ञान र सीपमार्फत सिकाइ बढी लाभदायी हुन्छ । लिटल बडी प्रि–स्कुलले छोटो अवधिमा उल्लेखनीय उपलब्धि हासिल गरेको छ, र आगामी दिनमा पनि यसले बालबालिकाको सर्वाङ्गीण विकासमा योगदान पुर्याउनुपर्छ ।’
कार्यक्रम प्रिन्सिपल विजय कुमार बलको अध्यक्षतामा सञ्चालन भएको थियो । यसमा विद्यालयका निर्देशक तथा प्याब्सन वीरगंज महानगरका अध्यक्ष राहुल श्रीवास्तव, प्रेस सेन्टर नेपाल मधेश प्रदेशका अध्यक्ष नीरज पिठाकोटे, प्रेस युनियन पर्साका उपाध्यक्ष अलि असगर देवान, डा. प्रिती यादव, नेपाल इनोभेटिभ सोसाइटीका अध्यक्ष कमल चौगाईलगायत विभिन्न संघ–संस्थाका प्रतिनिधि र अभिभावकहरूको उपस्थिती रहेको थियो ।
कार्यक्रमको आकर्षण बनेका विद्यालयका बालबालिकाहरूले प्रस्तुत गरेका नृत्य र सांस्कृतिक कार्यक्रमहरूले उपस्थित सबैलाई रमाइलो मनोरञ्जन प्रदान गरे । 
प्रतिक्रिया दिनुहोस् !