वीरगंज (पर्सा), ७ फागुन । जिल्ला प्रहरी कार्यालय पर्साले चोरीका दुई वटा मोटरसाइकल र एक वटा स्कुटरसहित तीन जना युवकलाई पक्राउ गरेको छ । प्रहरीका अनुसार यही माघ ५ गते साँझ करिब ८ः३० बजे वीरगंज महानगरपालिका वडा नं. १३ राधेमाईस्थित सडकखण्डमा वडा प्रहरी कार्यालय श्रीपुरबाट खटिएको गस्ती टोलीले एक युवकलाई संकास्पद रूपमा मोटरसाइकल डोर्याउँदै लगिरहेको अवस्थामा नियन्त्रणमा लिएको हो । जाँचका क्रममा उक्त मोटरसाइकलमा पछाडिको नम्बर प्लेट र साँचो नदेखिनुका साथै अगाडिका तार काटिएको पाइयो ।
नियन्त्रणमा लिइएका वीरगंज-१३ श्रीपुर बस्ने १९ वर्षीय साहिल कुमार रौनियारसँग सोधपुछ गर्दा उनले उक्त मोटरसाइकल पाँच दिनअघि र अर्को नम्बर प्लेट नभएको हुन्डा साइन मोटरसाइकल समेत तीन जनाले मिलेर वीरगंज-१३ दृष्टी आँखा अस्पताल क्षेत्रबाट रातिको समयमा चोरी गरेको खुल्न आएको प्रहरीले जनाएको छ । चोरी गरिएका सवारीसाधनहरू श्यामबाबु ठाकुरको कोठामा लुकाइछिपाइ राखिएको अवस्थामा बरामद गरिएको हो ।
यस घटनामा संलग्न रहेको आरोपमा वीरगंज–१३ का १९ वर्षीय श्यामबाबु ठाकुर र भारत बिहार राज्य पूर्वी चम्पारण जिल्ला सुगौली घर भई हाल वीरगंज-१३ बस्ने १९ वर्षीय रोशन कुमार गुप्तालाई पनि पक्राउ गरिएको प्रहरीले जानकारी दिएको छ । बरामद सवारीसाधनमा बि.आर. ०५ ए.क्यु. ६९२४ नम्बर प्लेट लगाइएको टिभिएस कम्पनीको मोटरसाइकल, नम्बर प्लेट नभएको अर्को मोटरसाइकल तथा ना ५५ प १५ नम्बरको कालो रंगको स्कुटर रहेका छन् ।
पक्राउ परेकाहरूलाई चोरी तथा डाँका सम्बन्धी कसूरमा पर्सा जिल्ला अदालतबाट ७ दिनको म्याद थप अनुमति लिई थप अनुसन्धान भइरहेको जिल्ला प्रहरी कार्यालय पर्साका प्रवक्ता प्रहरी नायब उपरीक्षक हरि बहादुर बस्नेतले जानकारी दिए ।
प्रतिक्रिया दिनुहोस् !