कलैया (बारा), २६ पुस । बाराको फेटा गाउँपालिकाको आयोजनामा तथा रिपुमर्दन गण, कलैया बाराको सहकार्यमा पुरैनिया स्वास्थ्य चौकी (गहेरिया) मा निःशुल्क स्वास्थ्य शिविर सभ्य र व्यवस्थित रूपमा सम्पन्न भएको छ । फेटा गाउँपालिका प्रमुख रुस्तम अन्सारीको प्रमुख आतिथ्यतामा सम्पन्न कार्यक्रममा गाउँपालिकाकी उपप्रमुख निलम साह विशिष्ट अतिथिका रूपमा सहभागी भएका थिए । साथै, स्वास्थ्य शाखाका कर्मचारीहरू तथा गाउँपालिकाका विभिन्न कर्मचारीहरूको उल्लेखनीय उपस्थिति रहेको थियो ।
स्वास्थ्य शिविरमा ज्येष्ठ नागरिक विशेष सेवा, नाक–कान–घाँटी तथा आँखा उपचार सेवा, स्त्री रोग तथा प्रसूति सेवा, साथै बाल रोग सम्बन्धी विशेष सेवाहरू प्रदान गरिएको थियो । शिविरबाट १,४०० भन्दा बढी सेवाग्राहीहरूले प्रत्यक्ष रूपमा स्वास्थ्य सेवा लिएको आयोजकले जनाएको छ । कार्यक्रममा रिपुमर्दन गणका गणपति तथा अन्य विशिष्ट अतिथिहरूको पनि विशेष उपस्थिति रहेको थियो ।
शिविरको प्रभावकारी सञ्चालनमा मनोहर साह, श्याम साह लगायतको सक्रिय सहजीकरण रहेको आयोजकले जनाएको छ । घर नजिकै निःशुल्क तथा गुणस्तरीय स्वास्थ्य सेवा पाउन पाउँदा स्थानीयवासीहरूले खुशी व्यक्त गर्दै आयोजक फेटा गाउँपालिका र सहकार्य संस्थाप्रति आभार व्यक्त गरेका छन् । फेटा गाउँपालिकाले ग्रामीण क्षेत्रका नागरिकहरूको स्वास्थ्य सेवामा पहुँच अभिवृद्धि गर्ने उद्देश्यले यस्ता जनमुखी स्वास्थ्य कार्यक्रमहरूलाई आगामी दिनमा पनि निरन्तरता दिने प्रतिबद्धता जनाएको छ ।
प्रतिक्रिया दिनुहोस् !