वीरगंज (पर्सा), २६ पुस । श्री गणेश बचत तथा ऋण सहकारी संस्थाको १७ औँ वार्षिक साधारण सभा सम्पन्न भएको छ । साधारण सभाको उद्घाटन गर्दै प्रमुख अतिथि वीरगंज उद्योग वाणिज्य संघका अध्यक्ष हरि गौतमले आर्थिक अनुशासन कायम गर्न, बचत संस्कार विकास गर्न तथा स्थानीयस्तरमा उद्यमशीलता प्रवद्र्धन गर्न सहकारीहरू महत्वपूर्ण आधार बनेको उल्लेख गरे । अध्यक्ष गौतमले सहकारी संस्थाले सदस्यहरूको स–साना बचतलाई उत्पादनमूलक क्षेत्रमा लगानी गर्दै रोजगारी सिर्जना र आत्मनिर्भर अर्थतन्त्र निर्माणमा उल्लेखनीय योगदान पुर्याइरहेको बताए ।
कार्यक्रममा नेपाल उद्योग वाणिज्य महासंघका केन्द्रीय सदस्य डा. सुबोद गुप्ताले सहकारी तथा व्यावसायिक संस्थाहरूले मुलुकको आर्थिक विकासमा खेलेको भूमिकाको प्रशंसा गरे । उनले सहकारी र निजी क्षेत्रलाई आर्थिक समृद्धिका दुई मुख्य खम्बाका रूपमा चित्रण गर्दै पारदर्शिता, सुशासन र सदस्यहरूको सक्रिय सहभागिता विना कुनै पनि संस्था दीगो हुन नसक्ने धारणा राखे । वर्तमान आर्थिक चुनौतीका बाबजुद बचत र लगानीको संस्कार विकास गर्न सहकारीहरूको भूमिका अझ प्रभावकारी हुनुपर्नेमा उनले जोड दिए ।
संस्थाका अध्यक्ष प्रदिप केडियाले प्रतिवेदन प्रस्तुत गर्दै आर्थिक वर्ष २०८१/०८२ मा संस्थाले २७ करोड ११ लाख ६० हजार ५ सय ६६ रुपैयाँ निक्षेप संकलन गरेको जानकारी दिए । सो अवधिमा ५१ लाख ४२ हजार ६ सय ४२ रुपैयाँ आम्दानी भएको पनि उहाँले बताए । यसै अवसरमा निर्विरोध चयन हुनुभएका अध्यक्ष गोपाल केडियाले आफ्नो कार्यकालमा पारदर्शिता, सुशासन र उत्तरदायित्वलाई उच्च प्राथमिकतामा राख्ने प्रतिबद्धता व्यक्त गरे । उनले सहकारीका सबै आर्थिक कारोबारलाई स्पष्ट, जवाफदेही र सदस्यमैत्री बनाउँदै सदस्यहरूको विश्वासलाई संस्थाको मुख्य पूँजीका रूपमा आत्मसात् गरेर अघि बढ्ने बताए ।
अध्यक्ष केडियाले सदस्यहरूको आवश्यकता र क्षमताअनुसार बचत तथा कर्जा योजनालाई थप प्रभावकारी बनाइने उल्लेख गर्दै कृषि, साना व्यवसाय, महिला उद्यमशीलता र युवा स्वरोजगारलाई प्राथमिकता दिई सहकारीलाई उत्पादनमुखी र आत्मनिर्भर बनाउने लक्ष्य लिइएको जानकारी दिए । साथै, आधुनिक प्रविधिको प्रयोगमार्फत सेवा प्रवाहलाई सरल, छरितो र समयानुकूल बनाइने उनको भनाइ थियो । साधारण सभाबाट केडियाको नेतृत्वमा नयाँ कार्यसमिति चयन गरिएको छ । उपाध्यक्षमा निरज अग्रवाल, महासचिवमा छठु लाल खेतान र कोषाध्यक्षमा प्रेमचन्द गोयल चयन भएका छन् ।
कार्यक्रममा वीरगञ्ज उद्योग वाणिज्य संघका निवर्तमान अध्यक्ष अनिल अग्रवाल, पूर्व अध्यक्ष गणेश लाठ, जिल्ला बचत तथा ऋण सहकारी संघका अध्यक्ष हरेराम पटेल, संस्थाका कानुनी सल्लाहकार विनय सिंहलगायतले आ–आफ्ना मन्तव्य व्यक्त गरेका थिए ।
प्रतिक्रिया दिनुहोस् !