वीरगंज महानगर क्षेत्रमा दुई समुदायबीच उत्पन्न तनावका कारण कर्फ्यु लागू भएसँगै सम्पूर्ण विद्यालय बन्द हुनु गम्भीर चिन्ताको विषय बनेको छ । शान्ति–सुरक्षाको नाममा लिइएका कदमले बालबालिकाको शिक्षा पूर्ण रूपमा अवरुद्ध हुनु कुनै पनि हालतमा स्वीकार्य हुन सक्दैन । यस अवस्थाप्रति राष्ट्रिय निजी तथा आवासीय विद्यालय एसोसिएसन नेपाल (नेशनल प्याब्सन) वीरगंज महानगर समितिले व्यक्त गरेको चिन्ता केवल एउटा संस्थाको आवाज मात्र होइन, यो सिङ्गो समाजको साझा सरोकार हो ।
शिक्षा कुनै समुदाय, दल वा आन्दोलनको सहायक विषय होइन । यो समाजको मेरुदण्ड हो, राष्ट्रको भविष्य हो । तर दुर्भाग्यवश, वीरगंजमा पटक पटक देखिँदै आएको तनाव, कर्फ्यु, आन्दोलन र बन्दका कारण सबैभन्दा बढी मारमा बालबालिका पर्दै आएका छन् । विद्यालय बन्द हुँदा केवल कक्षा रोकिन्न, बालबालिकाको मानसिक विकास, अनुशासन र भविष्यप्रतिको विश्वाससमेत कमजोर बन्दै जान्छ ।
नेशनल प्याब्सनले औँल्याएझैँ, यसअघि पनि बारम्बार लाग्ने बिदा र राजनीतिक गतिविधिले पठनपाठन प्रभावित हुँदै आएको छ । यस्तो निरन्तर अवरोधले विद्यार्थीहरूको शैक्षिक स्तर मात्र होइन, उनीहरूको मनोविज्ञानमा समेत गहिरो नकारात्मक असर पारिरहेको छ । शिक्षा अस्थिर हुँदा समाज पनि अस्थिर बन्छ, र अस्थिर समाजबाट समुन्नत भविष्यको कल्पना गर्न सकिँदैन ।
‘बालबालिका कुनै पनि आन्दोलन वा द्वन्द्वका जिम्मेवार होइनन्’ भन्ने सन्देश यस सम्पूर्ण घटनाको केन्द्रबिन्दु हो । आफ्ना मतभेद, असहमति र संघर्षको मूल्य समाजका सबैभन्दा निर्दोष वर्गले तिर्नुपर्ने अवस्था सभ्य समाजको पहिचान हुन सक्दैन । आन्दोलन, विरोध र दबाबका आफ्नै वैकल्पिक र जिम्मेवार माध्यम हुन सक्छन्, तर विद्यालय बन्द गरेर भविष्य बन्द गर्ने बाटो कदापि सही होइन ।
यस सन्दर्भमा स्थानीय सरकार, जिल्ला प्रशासन र राजनीतिक दलहरूको भूमिका झनै जिम्मेवार हुनुपर्छ । आपसी मतभेद भए पनि शिक्षा क्षेत्रलाई विवादभन्दा माथि राख्न सक्नु नै परिपक्व नेतृत्वको पहिचान हो । यदि विद्यालय बन्द हुने क्रम यसरी नै दोहोरिरह्यो भने अभिभावकहरूको विश्वास गुम्नेछ, वीरगंजको शैक्षिक छवि धुमिल हुनेछ र यसको दीर्घकालीन असर सहरको सामाजिक तथा आर्थिक संरचनामै पर्नेछ ।
अतः अहिलेको आवश्यकता संयम, संवाद र दायित्वबोध हो । शान्ति र सद्भाव कायम राख्नु केवल प्रशासनको काम होइन, यो हरेक समुदाय, दल र नागरिकको साझा जिम्मेवारी हो । बालबालिकाको शिक्षा सुरक्षित राख्नु भनेको राष्ट्रको भविष्य सुरक्षित गर्नु हो यस सत्यलाई बेवास्ता गर्ने छुट कसैलाई छैन । 
प्रतिक्रिया दिनुहोस् !