वीरगंज (पर्सा), २१ पुस । धनुषाको एक मस्जिदमा अपरिचित व्यक्तिहरुको समूहले तोडफोड गर्नुका साथै कुरान जलाएको घटनालाई लिएर दुई फरक समुदायबीच वीरगंजमा प्रदर्शन चर्किँदै गएपछि पर्सा प्रशासनले वीरगंजको सम्वेदनशील स्थानहरुमा कर्फ्यू आदेश जारी गरेको छ । दुई समुदायबीच उत्पन्न विवाद उग्र बन्दै गएपछि पर्सा प्रशासनले सोमबार साँझ ६ बजेदेखि मंगलबार विहान ८ बजेसम्मको लागि कर्फ्यू आदेश जारी गरेको हो ।
वीरगंज महानगरपालिका क्षेत्रमा बढ्दो तनावलाई नियन्त्रणमा लिन जिल्ला प्रशासन कार्यालय पर्साले कर्फ्यु आदेश जारी गरेको छ । स्थानीय प्रशासन ऐन, २०२८ को दफा ६ (क) बमोजिम जारी उक्त कर्फ्यु सोमबार साँझ ६ बजेदेखि मङ्गलवार बिहान ८ बजेसम्म लागू रहने प्रशासनले जनाएको छ । कर्फ्यु लागू हुने क्षेत्र पूर्वमा बाइपास रोड, पश्चिममा सिर्सिया पुल, उत्तरमा पावर हाउस चोक र दक्षिणमा शङ्कराचार्य गेटसम्मको चार किल्लाभित्र सीमित गरिएको छ । यस अवधिमा तोकिएको क्षेत्रभित्र कुनै पनि प्रकारको आवतजावत, भेला, जुलुस, प्रदर्शन वा घेराउ गर्न पूर्ण रूपमा निषेध गरिएको छ ।
प्रशासनका अनुसार सम्भावित जोखिमलाई मध्यनजर गर्दै शान्ति सुरक्षा कायम राख्न कर्फ्यु जारी गर्नुपरेको हो । कर्फ्यु अवधिमा सुरक्षाकर्मीले कडा सुरक्षा व्यवस्था अपनाउने जनाउँदै अत्यावश्यक कामबाहेक घरबाहिर ननिस्कन सर्वसाधारणलाई अनुरोध गरिएको छ । बाहिर निस्कनै परे नजिकका सुरक्षाकर्मीसँग समन्वय गर्न वा प्रहरी नियन्त्रण कक्ष (१००) मा सम्पर्क गरी अनुमति लिन आग्रह गरिएको छ । अत्यावश्यक सेवाहरूलाई कर्फ्युको दायराबाट छुट दिइएको छ । एम्बुलेन्स, दमकल, शव वाहन, स्वास्थ्यकर्मी, सञ्चारकर्मी, पर्यटक, मानवअधिकारकर्मी, कूटनीतिक सवारी साधन तथा हवाई टिकट भएका यात्रुहरूको आवागमनमा सहजीकरण गरिने प्रशासनले स्पष्ट पारेको छ ।
धनुषाको घटनालाई लिएर आइतबार मुस्लिम समुदायहरुले वीरगंजमा विरोध प्रदर्शन गरेका थिए । त्यस लगत्तै त्यही समुदायका एक युवकले विदेश बसी सामाजिक सञ्जालमा हिन्दु समुदायमाथि चोट पुर्याउने नियतले अभद्र र आपत्तिजनक टिप्पणी गरेका थिए । त्यही विषयलाई लिएर सोमबार हिन्दु समुदाले वीरगंजमा विशाल विरोध जुलुस प्रदर्शन गरेको थियो । दुबै समुदायको विरोध प्रदर्शनले आइतबारदेखि नै वीरगंज तनावग्रस्त बनेको छ । वीरगंजमा उत्पन्न तनावलाई शान्त पार्न जिल्ला प्रशासन कार्यालय पर्साले कर्फ्यु आदेश जारी गरेको हो ।
धनुषाको कमला–६ सखुवा मरानस्थित मुस्लिम टोलमा रहेको मस्जिदमा गत शनिबार तोडफोड गरिएको तथा मुस्लिम धर्मावलम्बीहरूको पवित्र ग्रन्थ कुरान जलाइएको घटनाको भिडियो सामाजिक सञ्जालमा सार्वजनिक भएपछि अवस्था झन् संवेदनशील बनेको हो । उक्त घटनाको विरोधमा वीरगंजमा आइतबारदेखि दुई फरक समुदायले आ-आफ्ना मागसहित प्रदर्शन गर्दै आएका छन् ।
प्रतिक्रिया दिनुहोस् !