वीरगंज (पर्सा), २१ पुस । हिन्दु धर्म, देवी-देवता, पर्व तथा मन्दिरहरूका विषयमा अभद्र र आपत्तिजनक टिप्पणी गर्ने व्यक्तिहरूमाथि कडा कानुनी कारबाहीको माग गर्दै सोमबार वीरगंजमा हिन्दु समाजको आह्वानमा हजारौँको सहभागितामा विशाल जुलुस तथा प्रदर्शन गरिएको छ । हिन्दु समाज तथा विभिन्न धार्मिक सङ्घ संस्थाहरूको संयुक्त सहभागितामा सम्पन्न उक्त प्रदर्शनमा युवा, महिला तथा समुदायका अगुवाहरूको उल्लेखनीय उपस्थिति रहेको थियो ।
धार्मिक आस्था र सामाजिक सद्भावको रक्षा गर्नुपर्ने मागसहित सहभागीहरू एकजुट भएर सडकमा उत्रिएका थिए । बिहान गहवामाई मन्दिर अगाडिबाट सुरु भएको जुलुस माइस्थान, आदर्शनगर हुँदै अलखिया चोकतर्फ अघि बढेको थियो । तर सम्भावित धार्मिक झडपको जोखिमलाई मध्यनजर गर्दै सुरक्षाकर्मीहरूले जुलुसलाई छपकैया क्षेत्रतर्फ जान नदिई घडिअर्वा पोखरीतर्फ मोडिदिएका थिए । घडिअर्वा, माइस्थान चोक र घण्टाघर हुँदै अघि बढेको जुलुस जिल्ला प्रशासन कार्यालय पर्सा अगाडि पुगेर कोणसभामा परिणत भएको थियो ।
कोणसभाका क्रममा प्रदर्शनकारीहरूले ‘हिन्दु धर्ममाथि टिप्पणी गर्नेलाई कारबाही गर’, ‘हिन्दु–हिन्दू भाइ–भाइ’ लगायतका नारा लगाउँदै धार्मिक सद्भाव र सामाजिक शान्ति खल्बल्याउने गतिविधिहरू कुनै पनि हालतमा स्वीकार्य नहुने बताएका थिए । उनीहरूले यस्ता गतिविधिमाथि राज्यले तुरुन्त र कडा कदम चाल्नुपर्ने मागसमेत राखेका थिए ।
जुलुसमा सहभागी हिन्दु अगुवा सन्तोष सर्राफले विदेशी भूमिमा बसेर हिन्दु धर्म, देवी–देवता तथा पर्वहरूमाथि अभद्र टिप्पणी गर्ने व्यक्तिहरूले समाजलाई विभाजन गर्ने प्रयास गरिरहेको आरोप लगाए । उनले यस्ता गतिविधि रोक्न सरकारको ध्यानाकर्षण गराउँदै दोषीमाथि कारबाही गर्न कूटनीतिक माध्यममार्फत समेत पहल गर्नुपर्ने बताए । ‘हिन्दु समुदायमाथि निरन्तर आक्रमण भइरहेपछि बाध्य भएर हामी सडकमा उत्रिनुपरेको हो,’ सर्राफले भने ।
सुरक्षा संवेदनशीलतालाई ध्यानमा राख्दै जिल्ला प्रहरी कार्यालय पर्साले व्यापक सुरक्षा व्यवस्था मिलाएको थियो । प्रदर्शन पूर्ण रूपमा शान्तिपूर्ण रहेको र कुनै पनि अप्रिय घटना नघटेको प्रहरीले जनाएको छ । यसैबीच, हिन्दु समाजका अगुवाहरू र प्रमुख जिल्ला अधिकारी भोला दाहालको नेतृत्वमा गठित विशेष सुरक्षा समितिबीच धार्मिक आस्था तथा भावनामा चोट पुर्याउने गतिविधिहरूलाई कानुनी दायरामा ल्याउने तदारुक्ता देखाएका छन् ।
यसअघि आइतबार साँझ पनि हिन्दु युवाहरूले वीरगंजमा मोटरसाइकल र्याली आयोजना गरेका थिए । प्रदर्शनकारीहरूले यस्ता अभिव्यक्ति तथा गतिविधिहरू भविष्यमा दोहोरिन नदिन राज्यलाई गम्भीर र सचेत भूमिका निर्वाह गर्न आग्रह गरेका छन् ।
प्रतिक्रिया दिनुहोस् !