वीरगंज (पर्सा), १७ पुस । नयाँ अंग्रेजी वर्षको पहिलो दिन बिहीबार वीरगंजमा पनि ‘राष्ट्रिय धोती दिवस’ भव्य रूपमा मनाइएको छ । डा. सीके राउत नेतृत्वको जनमत पार्टीका नेता कार्यकर्ताले मधेसको पहिचान र सांस्कृतिक धरोहरको संरक्षण तथा प्रवद्र्धन गर्ने उद्देश्यले वीरगंजमा राष्ट्रिय धोती दिवस मनाएका हुन् ।
धोती, कुर्ता र गम्छा पहिरनमा सजिएका जनमत पार्टीका नेता कार्यकर्ता बिहीबार बिहान वीरगंजको घण्टाघर चोकमा भेला भएका थिए । त्यहाँबाट उनीहरूले सांस्कृतिक झाँकीसहित र्याली निकाल्दै वीरगंज शहरको नगर परिक्रमा गरेका थिए । घण्टाघर चोकबाट सुरु भएको र्याली माईस्थान, आदर्शनगर र घडिअर्वा हुँदै पुनः घण्टाघर चोकमै पुगेर समापन गरिएको थियो ।
र्यालीपछि घण्टाघर चोकमा आयोजित कोणसभामा बोल्दै जनमत पार्टी पर्सा जिल्ला अध्यक्ष ओमप्रकाश सर्राफले धोती केवल मधेसी समुदायको पहिचान मात्र नभई एक महत्वपूर्ण सांस्कृतिक धरोहरसमेत भएको बताए । उनले धोती, कुर्ता र गम्छाजस्ता पहिरनलाई राज्यले राष्ट्रिय पोशाकको रूपमा मान्यता दिनुपर्ने माग दोहोर्याए ।
अध्यक्ष सर्राफले नेपाल बहुभाषिक र बहुसांस्कृतिक मुलुक भएपनि हालसम्म एउटा समुदाय विशेषको पोशाकलाई मात्र राष्ट्रिय पोशाकका रूपमा प्रवद्र्धन गरिँदै आएको उल्लेख गरे । सो अभ्यासलाई परिवर्तन गर्ने उद्देश्यले जनमत पार्टीले हरेक वर्ष जनवरी १ तारिखका दिन राष्ट्रिय धोती दिवस मनाउँदै आएको उनले जानकारी दिए ।
उनले अन्य जाति तथा समुदायका पहिरन र पोशाकप्रति आफ्नो पार्टीको सम्मान रहेको स्पष्ट पार्दै, धोती कुर्तालाई पनि राष्ट्रिय पोशाकको रूपमा समावेश गर्न राज्यले पहल गर्नुपर्ने धारणा राखे । कार्यक्रममा जनमत पार्टीकी नेतृ नजमा खातुन तथा नेताहरू बृजेश्वर प्रसाद चौधरी, राजनारायण मिश्र, कृष्ण कुशवाहा, राजु गिरीलगायतको उल्लेखनीय सहभागिता रहेको थियो ।
सहभागीहरूले धोतीलाई पहिचान, समानता र सांस्कृतिक स्वाभिमानको प्रतीकका रूपमा स्थापित गर्नुपर्नेमा जोड दिएका थिए । 
प्रतिक्रिया दिनुहोस् !