वीरगंज (पर्सा), १४ पुस । अशोक राई नेतृत्वको जनता समाजवादी पार्टी (जसपा) पुनः विभाजनको अवस्थामा पुगेको छ । यसअघि राजेन्द्र श्रेष्ठको नेतृत्वमा विभाजन भइसकेको जसपा यसपटक पार्टीकी उपाध्यक्ष रेणु यादवको नेतृत्वमा फेरि फुटेको हो । पछिल्लो विभाजनले मधेस केन्द्रित राजनीतिमा नयाँ हलचल ल्याएको छ ।
उपेन्द्र यादव नेतृत्वको जनता समाजवादी पार्टी (जसपा) नेपाल र महन्थ ठाकुर नेतृत्वको लोकतान्त्रिक समाजवादी पार्टी (लोसपा) नेपालबीच आइतबार पार्टी एकीकरणका लागि सैद्धान्तान्तिक सहमति भएको भोलिपल्टै अशोक राई नेतृत्वको जसपामा ठूलो विभाजन आएको हो । यो घटनालाई राजनीतिक वृत्तमा संयोगभन्दा बढी, मधेस केन्द्रित दलहरूबीचको पुनर्संरचनाको संकेतका रूपमा हेरिएको छ ।
जसपाकी उपाध्यक्ष रेणु यादवको नेतृत्वमा केही नेताहरू अशोक राई नेतृत्वको जसपाबाट अलग हुँदै उपेन्द्र यादव नेतृत्वको जसपा नेपालमा फर्किएका छन् । सोमबार उपेन्द्र यादव र रेणु यादवले संयुक्त विज्ञप्ति जारी गर्दै पार्टी एकताको औपचारिक जानकारी दिएका हुन् । विज्ञप्तिमा मधेसको साझा मुद्दालाई बलियो बनाउन एकता आवश्यक रहेको उल्लेख गरिएको छ ।
रेणु यादवसँगै पूर्व मन्त्री प्रदीप यादवलगायतका प्रभावशाली नेताहरूले अशोक राईसँगको सहकार्य अन्त्य गर्दै जसपा नेपालमा पुनः आबद्ध भएको घोषणा गरेका छन् । पूर्व मन्त्री प्रदीप यादवले पार्टीका बहुमत सदस्यहरूसहित मधेस केन्द्रित राजनीतिक शक्तिको ध्रुवीकरणमा आफूहरू लागिपरेको बताएका छन् । उनका अनुसार यो एकताले मधेसका मुद्दालाई थप सशक्त बनाउने विश्वास गरिएको छ ।
यता, जसपाका अध्यक्ष अशोक राईले भने केही नेताहरू जसपा नेपालमा गएको स्वीकार गर्दै आफू भने त्यहाँ नजाने स्पष्ट पारेका छन् । ‘म जाने होइन, केही नेताहरू जान लागेका छन्,’ राईले प्रतिक्रिया दिएका छन् । उनले आफ्नो नेतृत्वमा पार्टीलाई निरन्तरता दिने संकेत गरेका छन् ।
यसअघि २०८१ वैशाखमा उपेन्द्र यादव अमेरिका भ्रमणमा रहेका बेला अशोक राईले जसपा नेपालबाट अलग हुँदै नयाँ जसपा गठन गरेका थिए । पछिल्लो समय जसपा नेपाल र लोसपाबीच एकीकरणको सहमति भएपछि राई पक्षमा रहेका मधेसी नेताहरूमाथि पनि एकताका लागि दबाब बढ्दै गएको थियो । श्रोतका अनुसार अध्यक्ष राई एकीकरणका लागि तयार नभएपछि रेणु यादवको नेतृत्वमा केही नेताहरूले उपेन्द्र यादवसँग एकता गर्ने निर्णय गरेका हुन् ।
यस एकताले मधेस केन्द्रित राजनीतिमा नयाँ शक्ति सन्तुलन कायम गर्ने अपेक्षा गरिएको छ । यसैबीच, हृदयेश त्रिपाठी नेतृत्वको जनता प्रगतिशील पार्टी पनि एकीकरण प्रक्रियामा सामेल हुने चर्चा चलेको छ । मधेस केन्द्रित दलहरूको बढ्दो ध्रुवीकरणले आगामी निर्वाचनमा ठूला दलहरूलाई कडा चुनौती दिने राजनीतिक विश्लेषकहरूको अनुमान छ । 
प्रतिक्रिया दिनुहोस् !