वीरगंज (पर्सा), ९ पुस । बंगलादेशमा एक हिन्दु युवकलाई जिउँदै जलाएर निर्मम रूपमा हत्या गरिएको घटनाप्रति कडा विरोध जनाउँदै वीरगंजमा महिलाहरूले विरोध प्रदर्शन गरेका छन् । विश्व हिन्दु परिषद् नेपाल महिला विभागको अगुवाइमा बुधबार वीरगंजमा आयोजना गरिएको विरोध कार्यक्रमले मानवअधिकार, धार्मिक स्वतन्त्रता र अल्पसंख्यक समुदायको सुरक्षाप्रति गम्भीर प्रश्न उठाएको छ ।
ठाकुरराम बहुमुखी क्याम्पस अगाडिबाट सुरु भएको विरोध जुलुसमा महिला, युवती, किशोरी तथा छात्राहरूको उल्लेखनीय सहभागिता रहेको थियो । जुलुस आदर्शनगर, माइस्थान र घण्टाघर चोक हुँदै नगर परिक्रमा गर्दै जिल्ला प्रशासन कार्यालय परिसरमा पुगेर कोणसभामा परिणत भएको थियो । प्रदर्शनका क्रममा सहभागीहरूले बंगलादेशमा भएको जघन्य घटनाप्रति आक्रोश व्यक्त गर्दै दोषीमाथि कडा कारबाहीको माग गरेका थिए ।
कार्यक्रमपछि प्रदर्शनकारीहरूले पर्साका प्रमुख जिल्ला अधिकारी भोला दाहालमार्फत प्रधानमन्त्री तथा मन्त्रिपरिषद्को कार्यालयमा ज्ञापनपत्र बुझाएका छन् । ज्ञापनपत्रमा बंगलादेशमा ३० वर्षीय हिन्दु युवक दीपुचन्द्र दासको जघन्य हत्यामा संलग्न सबै दोषीलाई तत्काल पहिचान गरी कडा कानुनी कारबाही गर्न माग गरिएको छ । साथै घटनाको स्वतन्त्र, निष्पक्ष तथा अन्तर्राष्ट्रिय निगरानीसहित छानबिन गराउन नेपाल सरकारले बंगलादेश सरकारसँग कूटनीतिक पहल गर्नुपर्ने माग पनि उल्लेख गरिएको छ ।
प्रदर्शनकारीहरूले नेपाल सरकारले परराष्ट्र मन्त्रालयमार्फत उक्त घटनाको औपचारिक विरोध जनाउनुपर्ने, संयुक्त राष्ट्रसंघ तथा अन्तर्राष्ट्रिय मानवअधिकार मञ्चहरूमा विषय उठाएर बंगलादेशमाथि कूटनीतिक दबाब सिर्जना गर्नुपर्नेमा जोड दिएका छन् । नेपालस्थित बंगलादेशी दूतावासमार्फत घटनाबारे आधिकारिक स्पष्टीकरण माग गर्नुपर्ने माग पनि उनीहरूले अघि सारेका छन् ।
ज्ञापनपत्रमा बंगलादेशमा रहेका हिन्दु अल्पसंख्यक समुदायको जीवन, सम्पत्ति, धार्मिक स्वतन्त्रता, मठ मन्दिर तथा मान सम्मानको सुरक्षा सुनिश्चित गर्न बंगलादेश सरकारले ठोस र प्रभावकारी कदम चाल्नुपर्ने माग स्पष्ट रूपमा उल्लेख छ । अल्पसंख्यक समुदायमाथि भइरहेका हिंसा र विभेदका घटनाप्रति अन्तर्राष्ट्रिय समुदायको ध्यानाकर्षण गराउनुपर्ने आवाज पनि उठाइएको छ ।
यसैगरी, रोहिङ्ग्या तथा बंगलादेशीको नाममा नेपालमा भइरहेको अवैध घुसपैठ, कट्टरपन्थी गतिविधि र सम्भावित आतंकवादी सञ्जालमाथि कडा निगरानी गर्न सीमा नाकामा सुरक्षा व्यवस्था मजबुत बनाउनुपर्ने माग पनि प्रदर्शनकारीहरूले गरेका छन् । उनीहरूले नेपालमा धार्मिक सहिष्णुता, सामाजिक सद्भाव र राष्ट्रिय सुरक्षाको रक्षा गर्न सरकार गम्भीर र जिम्मेवार बन्नुपर्ने बताएका छन् ।
प्रदर्शन शान्तिपूर्ण रूपमा सम्पन्न भएको थियो भने सहभागीहरूले यस्ता घटनाविरुद्ध निरन्तर आवाज उठाइरहने प्रतिबद्धता व्यक्त गरेका छन् । 
प्रतिक्रिया दिनुहोस् !