वीरगंज (पर्सा), ५ पुस । बङ्गलादेशको म्यामनसिंह जिल्लामा भ्रमपूर्ण आरोपमा एक हिन्दु युवकको कुटपिट गरी हत्या गरेर शव जलाइएको घटनाविरुद्ध वीरगंजमा हिन्दु युवाहरूले शनिबार विरोध प्रदर्शन गरेका छन् । घटनामा संलग्न दोषीहरूलाई कडा कारबाहीको माग गर्दै उनीहरूले बङ्गलादेश सरकारको तीव्र आलोचना गरेका छन् ।
प्रदर्शनमा सहभागी हिन्दु युवाहरूले “हिन्दु मार्न पाइँदैन” र “बङ्गलादेशी मुसलमान मुर्दावाद” जस्ता नारा लगाउँदै वीरगंजका विभिन्न मुख्य सडक हुँदै नगर परिक्रमा गरेका थिए । त्यसपछि उनीहरू वीरगंजको घण्टाघर पुगेर बङ्गलादेशको झन्डा अङ्कित तस्बिरमा आगो लगाउँदै आक्रोश प्रकट गरेका थिए ।
प्रदर्शनकारीहरूले बङ्गलादेशमा अल्पसङ्ख्यक हिन्दु समुदाय असुरक्षित रहेको आरोप लगाउँदै निर्मम हत्या जस्ता घटनामा समेत सरकारले प्रभावकारी कारबाही नगरेको गुनासो गरे । उनीहरूले यदि दोषीमाथि तत्काल र कडा कारबाही नभए ठूलो आन्दोलन गर्न बाध्य हुने चेतावनीसमेत दिएका छन् ।
घण्टाघरमा आयोजित कोणसभालाई सम्बोधन गर्दै हिन्दु युवा नेता विकास साहले बङ्गलादेशमा यसअघि पनि पटक–पटक अल्पसङ्ख्यक हिन्दुहरूमाथि दमन र आक्रमणका घटना हुँदै आएको स्मरण गराए । हिन्दु धर्म शान्तिप्रेमी भएको उल्लेख गर्दै उनले विश्वको कुनै पनि कुनामा हिन्दुमाथि हुने अत्याचार, हिंसा र हत्या सह्य नहुने स्पष्ट पारे । ‘बङ्गलादेश सरकारले त्यहाँका हिन्दुहरूको सुरक्षा सुनिश्चित गर्नुपर्छ,’ उनले भने । 
बङ्गलादेशमा के भएको हो ?
बङ्गलादेशको म्यामनसिंह जिल्लाअन्तर्गत भालुका उपजिल्लामा गत बिहीबार राति २५ वर्षीय दिपु चन्द्र दास नामक हिन्दु युवकलाई पैगम्बर मोहम्मदको अपमान गरेको भ्रमपूर्ण आरोप लगाउँदै आक्रोशित भीडले कुटपिट गरी हत्या गरेको थियो । हत्या पछि भीडले उनको शव रुखमा बाँधेर आगो लगाएको बताइएको छ । दास स्थानीय एक कपडा कारखानामा काम गर्ने मजदुर थिए ।
उक्त घटना बङ्गलादेशमा छात्र नेता शरिफ उस्मान हादीको मृत्युपछि विभिन्न स्थानमा भइरहेको हिंसात्मक प्रदर्शनकै क्रममा भएको जनाइएको छ । घटनाप्रति प्रतिक्रिया जनाउँदै बङ्गलादेशको अन्तरिम सरकारका प्रमुख सल्लाहकार मोहम्मद युनुसले यस्तो हिंसाको कडा निन्दा गरेका छन् । ‘नयाँ बङ्गलादेशमा यस्ता हिंसात्मक घटनाको कुनै स्थान छैन,’ भन्दै उनले दोषीहरूलाई नछाड्ने प्रतिबद्धता व्यक्त गरेका छन् ।
यसैबीच, शनिबार र्यापिड एक्सन बटालियन (आरएबी) ले घटनामा संलग्न भएको आशङ्कामा सात जनालाई पक्राउ गरिएको घोषणा गरेको छ । शेख हसिनाको सरकार पतनपछि बङ्गलादेशमा अल्पसङ्ख्यक हिन्दुहरूमाथि आक्रमणका घटनाहरू बढ्दै गएको भन्दै विभिन्न मानवअधिकार संस्था तथा छिमेकी मुलुकहरूमा चिन्ता व्यक्त गरिएको छ । उक्त घटनाले नेपाल र भारतमा समेत गहिरो चासो उत्पन्न गरेको छ । भारतका विभिन्न राजनीतिक नेताहरूले पनि बङ्गलादेशमा रहेका हिन्दु अल्पसङ्ख्यकको सुरक्षाप्रति गम्भीर ध्यान दिन आग्रह गरेका छन् । 
प्रतिक्रिया दिनुहोस् !