वीरगंज (पर्सा), ५ पुस । भारत–भुटान सीमासँग जोडिएको भारतको असम राज्य अन्तर्गत तामूलपुर जिल्लाकी १७ वर्षीया नाबालिग किशोरी अञ्जली (नाम परिवर्तन) लाई पश्चिमी उत्तर प्रदेशको मुजफ्फरनगर जिल्लाबाट सकुशल उद्दार गरिएको छ । उक्त उद्दार संयुक्त तथा संवेदनशील मानवीय अभियान ‘मिसन निर्भया अपरेसन’ अन्तर्गत सफलतापूर्वक सम्पन्न भएको हो ।
प्राप्त जानकारीअनुसार कक्षा ८ मा अध्ययनरत ती किशोरी करिब छ महिनाअघि अचानक घरबाट बेपत्ता भएकी थिइन् । यस घटनापछि परिवारले असमको तामूलपुर थाना (प्रहरी चौकी) मा उजुरी दर्ता गराएका थिए । लामो समयसम्म खोजी गर्दा पनि किशोरीको कुनै अत्तोपत्तो नलागेपछि मानव तस्करीमा परेकी हुन सक्ने आशंका गहिरिँदै गएको थियो ।
अत्यन्तै गरिब तथा पीडित परिवारलाई सहयोग गर्ने उद्देश्यले सक्रिय असम सेन्टर फर रुरल डेभलपमेन्ट (ACRD Assam) ले घटनालाई गम्भीरतापूर्वक उठाउँदै इन्स्पेक्टर मनोज कुमार शर्माको ध्यानाकर्षण गराएको थियो । साथै सीमावर्ती मुख्यालय सशस्त्र सीमा बल (SSB) तेजपुरलाई पनि लिखित रूपमा जानकारी गराइएको थियो ।
मामलाको संवेदनशीलता र गम्भीरतालाई मध्यनजर गर्दै इन्स्पेक्टर मनोज कुमार शर्माले तत्काल अनुसन्धान प्रक्रिया अघि बढाए । अनुसन्धानका क्रममा पीडित परिवार, छिमेकी तथा विद्यालयका सहपाठीहरूसँग विस्तृत सोधपुछ गर्नुका साथै प्राविधिक विश्लेषणसमेत गरिएको थियो । यस क्रममा एक शंकास्पद मोबाइल नम्बर फेला परेको थियो, जसले अनुसन्धानलाई निर्णायक मोडतर्फ डोर्यायो ।
प्राविधिक अनुसन्धान गर्दा उक्त मोबाइल नम्बरको लोकेशन दिल्ली नजिकै पर्ने पश्चिमी उत्तर प्रदेशको मुजफ्फरनगर जिल्ला अन्तर्गत मन्सूरपुर थाना क्षेत्रको बेगराजपुर गाउँमा देखिएको थियो । सोही आधारमा थप अनुसन्धान अघि बढाइएको थियो । 
यस संवेदनशील उद्दार अभियानमा नयाँ दिल्लीस्थित मिसन मुक्ति फाउन्डेशनका निर्देशक वीरेन्द्र सिंहले महत्वपूर्ण भूमिका निर्वाह गरेका थिए । उनले विभिन्न सरकारी तथा गैरसरकारी निकायहरूबीच समन्वय गरी अपराधीसम्म पुग्ने प्रभावकारी रणनीति तयार पारेका थिए ।
राष्ट्रिय मानवअधिकार आयोग (NHRC) का सदस्य प्रियांक कानूनगोको निर्देशनमा क्क्द्य इंटेलिजेन्स युनिट (क्षेत्रीय मुख्यालय बेजपारा), उत्तर प्रदेशको मुजफ्फरनगर प्रहरी, मिसन मुक्ति फाउन्डेशन, रेस्क्यू एन्ड रिलिफ फाउन्डेशन तथा मानव तस्करी विरोधी इकाई (SSB बेजपारा) को संयुक्त टोली गठन गरी विशेष अपरेसन सञ्चालन गरिएको थियो ।
अपरेसन दुई तहमा सञ्चालन गरिएको थियो । एक टोली मुजफ्फरनगरमा जमिनस्तरमा सक्रिय भई प्रत्यक्ष कारबाहीमा जुटिएको थियो भने अर्को टोली फोन तथा ह्वाट्सएपजस्ता डिजिटल माध्यममार्फत सूचनाको आदान–प्रदान, प्राविधिक विश्लेषण र समन्वयको काममा संलग्न थियो । यस संयुक्त र द्रुत प्रयासको परिणामस्वरूप आरोपीलाई पक्राउ गरी नाबालिग किशोरीलाई सकुशल उद्दार गर्न सफलता प्राप्त भएको हो ।
उद्दारपछि किशोरीलाई आवश्यक चिकित्सकीय परीक्षण तथा उपचारका साथै मनोसामाजिक परामर्शका लागि सम्बन्धित निकायको जिम्मा लगाइएको छ । घटनासम्बन्धी विस्तृत प्रतिवेदन चाँडै सार्वजनिक गरिने जनाइएको छ । मानव तस्करीजस्तो गम्भीर अपराध विरुद्ध गरिएको यो सफल अपरेसन अन्तर–एजेन्सी समन्वय, संवेदनशीलता र द्रुत कार्यवाहीको सशक्त उदाहरणका रूपमा प्रस्तुत भएको छ । 
प्रतिक्रिया दिनुहोस् !