सिमरा (बारा), ८ मंसिर । बाराको सिमरास्थित जगदम्बा स्टिल, त्रिवेणी सिम्पेक्स, हुलास स्टिललगायतका उद्योगमा कार्यरत मजदुरहरू आन्दोलित बनेका छन् । अफ्नो माग पूरा गराउनुपर्ने भन्दै उनीहरूले सोमबार सिमरा बजार परिक्रमा गर्दै इलाका प्रशासन कार्यालय (ओ.ए.ओ.) सिमरा अगाडि धर्ना तथा नाराबाजीसमेत गरे ।अखिल नेपाल औद्योगिक मजदुर संघ, जिल्ला समिति बाराको नेतृत्वमा भएको प्रदर्शनमा सहभागी मजदुरहरूले उद्योग प्रशासन र सम्बन्धित निकायले पटक–पटक उठाउँदै आएका माग बेवास्ता गरेको आरोप लगाए । तलब वृद्धि, सामूहिक सम्झौताको कार्यान्वयन, र नियमित काममा अनियमित श्रमिक राख्ने प्रवृत्तिको अन्त्य गरी स्थायी पदमा स्थायी श्रमिक नियुक्त गर्ने व्यवस्थालाई लागू गराउन उनीहरूले दाबी गरे ।
यससँगै आफूहरूमाथि लगाइएका ‘झुटा मुद्दा’ खारेज गर्न, निष्कासित श्रमिकलाई तुरुन्तै पुनरबहाली गर्न, बन्द अवस्थामा रहेका उद्योगहरू शीघ्र सञ्चालनमा ल्याउन तथा बोनस सम्झौता पूर्ण कार्यान्वयन गर्न मजदुरहरूले जोड दिए । श्रम ऐन र सामाजिक सुरक्षा ऐनलाई व्यवहारिक रूपमै कार्यान्वयन गर्नुपर्ने उनीहरूको मुख्य मागको रूपमा प्रस्तुत गरिएको छ ।
‘न्यूनतम पारिश्रमिक लागू गर’, ‘मजदुर मार्न पाइँदैन’, ‘संसारका मजदुर एक हौँ’ जस्ता नाराले वातावरण गुञ्जायमान बनाउँदा प्रदर्शनकारीले श्रम अधिकार राज्य र उद्योग दुवैले सम्मान गर्नुपर्नेमा जोड दिए । उनीहरूका अनुसार, श्रमिक–मित्र वातावरण निर्माण नगर्ने हो भने औद्योगिक क्षेत्रमै अस्थिरता बढ्न सक्ने चेतावनी छ ।
माग पूरा नभए आन्दोलनलाई अझ सशक्त बनाउँदै लैजाने चेतावनी दिँदै मजदुरहरूले श्रम समस्या समाधानका लागि उद्योग व्यवस्थापन र सरकारी निकायलाई तत्काल गम्भीर ध्यानाकर्षण गराएका छन् ।
प्रतिक्रिया दिनुहोस् !