काठमाडौं,८ मंसिर । काठमाडौं महानगरपालिका पछिल्लो समय प्रशासनिक दण्ड–जरिवानामा आक्रामक देखिएको छ । महानगरले चालु आर्थिक वर्षको आर्थिक ऐनको अनुसूची १६ मा २० वटा बुँदामा दण्ड–जरिवानाको व्यवस्था गरेको छ ।
चालु आर्थिक वर्षको कात्तिक मसान्तसम्म ९० लाख ६७ हजार रुपैयाँ प्रशासनिक दण्ड–जरिवानाबाट उठाएको छ । जुन वार्षिक लक्ष्यको ३६.२७ प्रतिशत हो । महानगरले २ करोड ५० लाख वार्षिक लक्ष्य राखेको छ ।
महानगरले शुक्रबारमात्रै दरबारमार्गमा फोहोर गरेको भन्दै सत्तारुढ दल नेकपा एमालेलाई एक लाख रुपैयाँ जरिवाना तिरायो ।
२८ असारमा महानगरले कलंकीमा रहेको बर्गर हाउस एन्ड क्रन्ची फ्राइड चिकेनलाई २ लाख रुपैयाँ जरिवाना गरेको थियो । अनलाइन मःम अर्डर गर्ने ग्राहकलाई गन्धयुक्त अस्वस्थ्यकर अचार पठाएको पुष्टि भएपछि ‘बजार व्यवस्थापन तथा अनुगमन ऐन’ बमोजिम कारबाही गरिएको महानगरले जनाएको छ । महानगरले आफ्नै कार्यालय भवनमा सञ्चालित नारायणी चमेना गृहलाई पनि २ लाख रुपैयाँ जरिवाना गरेको थियो ।
२७ साउनमा महानगरले अनामनगरमा रहेको किम्ची रेस्टुरेन्ट एन्ड फास्ट फुडलाई २ लाख जरिवाना गरेको थियो । सिलभित्र रहेको खानेपानीमा किरा देखिएपछि कारबाही गरेको थियो । ३० साउनमा ‘अक्वा त्रिदेव’ ब्रान्डबाट उत्पादित जारको पानीमा कोलिफर्म भेटिएपछि महानगरले २ लाख जरिवाना गर्ने निर्णय गरेको थियो । यो तारकेश्वर नगरपालिका–१० मा सञ्चालित जाम्बुलिङ्गा ग्रुप इन्डस्ट्रीले उत्पादन गरेको पानी हो ।
१२ भदौमा काठमाडौं महानगरले श्रीकेश तेल उत्पादक कम्पनी सप्तऋषि आयल एन्ड कस्मेटिक इन्डस्ट्रीलाई २ लाख रुपैयाँ जरिवाना गरेको थियो । तेलमा प्रयोग हुने कच्चापदार्थको प्राविधिक सम्मिश्रणको विधि (फर्मुलेसन, रेसिपि मेथड) उल्लेख गरिएको कागजात प्राप्त हुन नसकेको र कारखानामा स्ट्यान्डर्ड अपरेसन प्रोसिडियोर (एसओपी) को अभिलेख नपाइएपछि कारबाही गरेको थियो ।
त्यस्तै १ कात्तिकमा बुद्धमाई अस्पताल टेकुलाई फोहोर व्यवस्थापनमा लापरबाही गरेका कारण १ लाख रुपैयाँ जरिवाना गरेको थियो । चौथो पटक अनुगमन गर्दा पनि अवस्थामा सुधार नभएको र सुधार गर्ने प्रयास पनि नभएको देखिएपछि महानगरले जरिवाना तिराएको थियो । ५ मंसिरमा महानगरले सुकेधाराको होटल मेक्योरलाई ५० हजार रुपैयाँ जरिवाना गरेको थियो । होटलले बाटोमा फोहोर फालेको भन्दै जरिवाना तिराएको थियो ।
प्रतिक्रिया दिनुहोस् !