काठमाडौं, १३ असोज । मुलुकको मुख्य राजमार्गमा यातायात ठप्प हुँदा हवाई उडानमा अत्यधिक चाप बढेको छ । आइतबार बिहानैबाट उडान नियमित भएको वायुसेवा कम्पनीले जानकारी दिएको छ । तर, पछिल्लो तीन दिनयता उडान नियमित हुन नसकेका कारण नयाँ यात्रुले टिकट पाउनै मुस्किल देखिएको छ ।
यती एयरलाइन्सका प्रवक्ता सुदर्शन बर्तौला भन्छन्, ‘आज असाध्यै धेरै टिकटको माग आएको छ,’ ‘पहिला नै टिकट काटेका यात्रु र नयाँ यात्रुको व्यवस्थापन मिलाउनै हम्मे परेको छ ।’ आज सबै गन्तव्यमा जहाज पूणर्क्षमतामा उडेको भन्दै यसले त्रिभुवन विमानस्थल व्यवस्थापनमा समेत चाप परेको उनले बताए । त्रिभुवन विमानस्थल कार्यालयका अनुसार आज अन्तर्राष्ट्रिय वायुसेवा कम्पनीले समेत उडान संख्या बढाएका छन् । यसले विमानस्थलमा उडानको व्यवस्थापन मिलाउन चाप भएको हो ।
कम्पनीहरूका अनुसार आज मौसम राम्रो भए रात्रिकालीन उडान गरेर भए पनि धेरै यात्रुलाई काठमाडौं ल्याउने र बाहिर लैजाने योजना छ । ‘यात्रुले आज धैर्य गरिदिनुभयो भने भोलिसम्म धेरै यात्रुलाई हामी व्यवस्थापन गरिसक्छौं,’ यतीका प्रवक्ता बर्तौलाले भने । झापा लगायत गन्तव्यबाट विदेश जानुपर्ने यात्रुले जहाज चार्टर्डको समेत माग गरेको वायुसेवा कम्पनीले जनाएका छन् । बुद्ध एयरका अनुसार आज सबै विमानस्थलमा नियमित उडान भइरहेको छ ।
यसअघि टिकट काटेका बाहेक अतिरिक्त टिकट व्यवस्थापनमा समस्या छ । काठमाडौं जोड्ने सबै राजमार्ग अवरुद्ध छन् । यसको असर हवाई उडानमा देखिएको हो ।
प्रतिक्रिया दिनुहोस् !