वीरगंज (पर्सा), १० भदौ । भारत विहारको समस्तीपुर स्थित दुर्घटनामा परि घाइते भएका बारा जिल्लाको बारागढी गाउँपालिकाका तीर्थयात्रुहरुलाई नारायणी अस्पतालमा निःशुल्क उपचार गरिएको छ । भारतखको झारखण्ड स्थित वैद्यनाथ धाम (देवघर) जल चढाउन निस्केको बारागढी गाउँपालिका वडा नं. ३ का ४३ जना तीर्थयात्रुहरु सवार ना ७ ख ६४४६ नम्बरको बस आइतबार विहान दुर्घटनामा परेको थियो ।
दुर्घटनामा परि घाइते भएका बारागढी गाउँपालिका वडा नं. ३ मुर्किपलियाका २२ जना तीर्थयात्रुहरुलाई वडाध्यक्ष उमेश साह कानुको समन्वयमा एम्बुलेन्समा राखेर सोमबार विहान उपचारका लागि वीरगंज स्थित नारायणी अस्पतालमा ल्याइएको थियो । घाइतेहरुलाई नारायणी अस्पताल सामाजिक सेवा इकाई अन्तर्गत निःशुल्क उपचार गरिएको शाखा प्रमुख सोनालाल चौरसियाले जानकारी दिए । उनका अनुसार २२ जना घाइतेहरुमध्ये १९ जनालाई सामाजिक सेवा इकाई मार्फत निःशुल्क उपचार गरि घर पठाइसकिएको जानकारी दिए ।
सहदेव मुखिया बिन, श्रीपति देवी, सर्वेन्द्र मुखिया, आशा देवी, पार्वती देवी, बिरेन्द्र मुखिया, मोति पण्डित, विनोद पण्डित, पर्मिला देवी, राजकुमार साह, रामेश्वर साह कानु, गीता देवी, सीमा कुमारी, दुखिया देवी, मरछिया देवी, लक्ष्मी राउत, रिना देवी लगायत २२ जना घाइतेहरुलाई उपचारको लागि नारायणी अस्पतालमा ल्याइएको थियो । घाइतेमध्ये १९ जना उपचार गराएर घर फर्किसकेका छन् भने ३ जनाको अवस्था गम्भिर रहेको छ ।
घाइतेहरुमध्ये देवनारायण पण्डित, किशोरी राम एवं उर्मिला देवी बीनको अवस्था गम्भिर रहेको नारायणी अस्पतालले जानकारी दिएको छ । घाइतेहरुको हात, खुट्ट, टाउकोमा चोट पटक लागेको थियो । बारागढी गाउँपालिका-३ मुर्किपलियाबाट तीर्थयात्रु बोकेर हिँडेको बस आइतबार बिहान भारतको समस्तीपुरको एन.एच.-२८ (नेशनल हाइवे-२८) मा दुर्घटनामा परेको थियो । तीव्र गतिमा आएको ट्रकले ठक्कर दिदाँ बस सडकमै पल्टिएको थियो । 
प्रतिक्रिया दिनुहोस् !