• मुस्कान श्रेष्ठ
वीरगंज (पर्सा), ४ भदौ । वीरगंजमा नेवार समुदायले आज गाईजात्रा पर्व भव्यताका साथ मनाएको छ । वीरगंज सापारु समितिले आयोजना गरेको पर्वमा नेवार समुदायको उत्साहजनक सहभागिता रहेको थियो । वीरगंजको अलख्यामठबाट निकालिएको गाईजात्रा आर्दशनगर, महावीरस्थान, माईस्थान, गणेशमान चोक, विर्ता हुँदै पुनः अलख्यामठमा आएर समापन भएको थियो ।
परम्परागत पर्व गाईजात्रामा एक वर्षभित्र दिवङ्गत भएका आफन्तको सम्झनामा ससाना बालबालिकालाई गाईका रूपमा सिँगारी आ-आफ्ना क्षेत्रमा परिक्रमा गराउने गरिन्छ । उनीहरुलाई श्रद्धालुद्वारा श्रद्धापूर्वक फलफुलहरु दान गर्ने गरिन्छ । यसरी गर्नाले वर्षभरि दिवङ्गत भएका व्यक्तिहरू गाईको पुच्छर समाई वैतरणी पार हुन्छन् भन्ने धार्मिक विश्वास रहेको वीरगंज सापारु समितिका अध्यक्ष संजय जोशीले जानकारी दिनुभयो ।
राजा प्रताप मल्लले पुत्रशोकले विह्वल भएकी आफ्नी रानीलाई दुनियाँले पनि यस्तै शोक बेहोर्नुपर्छ भन्ने देखाउन ‘आ-आफ्नो घरका मरेका व्यक्तिका नाममा गाईजात्रा निकाली शहर परिक्रमा गराउनु’ भनी आज्ञा दिएका आधारमा यो पर्व शुरू भएको ऐतिहासिक तथ्य छ ।
प्रतिक्रिया दिनुहोस् !