मलंगवा (सर्लाही), ३१ साउन । आ.व. २०८०/०८१ को अवधिमा सर्लाही प्रहरीले विभिन्न मुद्दामा फरार रहेका ६२० जना फरार प्रतिवादीलाई पक्राउ गरेको छ । सम्मानित जिल्ला अदालत सर्लाहीबाट विभिन्न समयमा कैद जरिवाना ठेकी फरार रहेका प्रतिवादीहरुमध्ये ६२० जनालाई पक्राउ गरि अदालतमा बुझाई जरिवाना असुल उपर गराएको हो ।
समाजमा शान्ति सुरक्षा तथा सर्वसाधारणहरुलाई अमनचयन प्रत्याभूति दिलाउने उद्देश्यले फरार प्रतिवादी पक्राउ गर्ने अभियान अन्तर्गत एक वर्षको अवधिमा सर्लाही प्रहरीले ६२० जना फरार अभियुक्तलाई पक्राउ गरेको हो । पक्राउ परेका अभियुक्तहरुबाट जिल्ला अदालत सर्लाहीले ८९ लाख २८ हजार ५१८ रुपैयाँ जरिवाना असुल उपर गरेको छ भने ८५ वर्ष २ महिना १ दिन कैदसजाय फैसला गरेको हो ।
जिल्ला प्रहरी कार्यालय सर्लाहीका प्रहरी उपरीक्षक रबिन्द्र बहादुर सिंहको निर्देशनमा खटिएको प्रहरी टोलीले फरार प्रतिवादीहरुलाई पक्राउ गरेको हो । पक्राउ परेका प्रतिवादीहरुमध्ये अधिकाँश जिल्ला अदालत सर्लाहीले अपराधी पुष्टि गरिसकेर फरार रहेका थिए । अदालतको फैसला कार्यान्वयनको लागि सर्लाही प्रहरीले प्रतिवादी एवं अपराधीहरुलाई पक्राउ गर्न सफल भएको हो ।
सर्लाही जिल्ला आफैमा नेपाल भारतको खुल्ला सिमामा पर्ने भएकोले अदालतले अपराधी पुष्टि गरिसकेका व्यक्तिहरु नेपाल एवं भारतीय सीमावर्ती सहरमा लुकेर बस्दै आएका थिए । विगत लामो समयदेखि फरार प्रतिवादीको लिस्टमा रहेका अपराधीहरुलाई भारतीय प्रहरीको समन्वयमा पक्राउ गरिएको जिल्ला प्रहरी कार्यालय सर्लाहीका सूचना अधिकारी एवं प्रहरी नायब उपरीक्षक दिपक श्रेष्ठले जानकारी दिए । नेपालमा अपराधिक क्रियाकपाल गरेर भारतमा लुकेर बस्ने परम्पराले पनि सर्लाहीमा अपराधिक घटनामा कमि हुन सकेको थिएन तर प्रहरी उपरीक्षक रबिन्द्र बहादुर सिंहको निर्देशनमा फरार प्रतिवादी एवं अपराधीहरुलाई पक्राउ गर्ने अभियान नै संचालन गरिएको थियो ।
जस अन्तर्गत आर्थिक वर्ष २०८०/०८१ मा एक वर्षको अवधिमा मात्रै ६२० जना प्रतिवादीहरुलाई पक्राउ गर्न सफल भएको हो । यस कार्यबाट अपराधिक क्रियाकपाल गर्नेहरुमा त्रास छाएको छ भने अपराधिक घटनाहरुमा केही कमि भएको छ, जसले गर्दा यहाँका सर्वसाधारणहरु शान्ति सुरक्षा महसुस गर्न थालेका छन् ।
प्रतिक्रिया दिनुहोस् !